Rusiya Ukraynaya hava zərbələri endirərək, Pasxa bayramına görə qəbul edilən atəşkəs qərarına qəfildən son qoyub. Bu arada prezident Vladimir Putin Kiyevin mülki hədəflərə hücumları bir ay müddətinə dayandırmaq təklifi ilə bağlı suallar qaldırıb.

Aprelin 21-də edilən yeni hücumlar ABŞ prezidenti Donald Trampın iki tərəf arasında daha geniş atəşkəsə dair ümidlərinə kölgə salıb. Tramp hücumlardan bir neçə saat əvvəl deyib ki, bu həftə “razılıq” əldə oluna bilər.

Putin Ukrayna hakimiyyətinin 30 saatlıq, qismən müşahidə olunan atəşkəsdən sonra bir gecədə pilotsuz təyyarə və artilleriya zərbələri barədə məlumat verməsindən sonra “Hərbi əməliyyatlar bərpa olunub” deyib.

Hər iki tərəf də Putinin aprelin19-u elan etdiyi atəşkəsin minlərlə dəfə pozulduğunu iddia edib. Lakin Putin Ukraynanın iddia edilən pozuntularını sadalayaraq deyib: “Ümumiyyətlə, belə aktivlikdə azalma müşahidə olundu. Biz bunu alqışlayırıq və gələcəyə baxmağa hazırıq".

Prezident Vlodomir Zelenski atəşkəsi alqışlayıb, lakin Ukrayna ordusunun Rusiya qüvvələrinin hücumlarına “simmetrik” cavab verəcəkləri barədə xəbərdarlıq edib.

Kiyev rəsmiləri iddia ediblər ki, Putin atəşkəs təklifi ilə təbliğatda qələbə qazanmağa çalışır. Təklif Trampın üç illik müharibəni bitirmək səylərində irəliləyiş görmədiyi təqdirdə geri çəkilməklə hədələməsindən bir neçə saat sonra təqdim edilib.

Ölkə daxilində hava hücumu xəbərdarlığının olmadığı bir günü alqışlayan Zelenski aprelin 20-də təqib etməyi təklif edib. Bu təklifə "ən azı 30 gün müddətində uzun mənzilli pilotsuz təyyarələr və raketlərlə mülki infrastruktura hücumların dayandırılması" daxildir.

Zelenski "dəqiq cavab" gözləyir

Putin Rusiyanın bu fikri “təhlil edəcəyini” söyləyib, lakin onun necə işləyəcəyini şübhə altına alıb və Ukraynanı restoran və universitetlər kimi mülki binalardan hərbi məqsədlər üçün istifadə etməkdə ittiham edib.

Rusiyanın konkret hücumu ilə bağlı nadir şərhlər irəli sürən Putin bildirib ki, Ukrayna aprelin 13-də hərbi mükafatlandırma mərasimi üçün Sumidəki universitet binasından istifadə edib. Bu arada Rusiyanın iki ballistik raketi şəhər mərkəzinə düşüb, ən azı 35 nəfər həlak olub.

"Bu mülki obyektdir, ya yox? Amma rejim bu mülki obyektlərdən istifadə edir", - Putin bildirib.

“Biz bunu həll etməliyik”, - deyən Putin Ukrayna ilə məsələ barədə ikitərəfli danışıqları istisna etməyib:

“Biz hər şeyi təhlil edəcəyik və buna uyğun qərarlar verəcəyik”.

Aprelin 21-i gecəsi Zelenski Rusiyanı atəşkəs təklifinə “dəqiq cavab” verməyə çağırıb.

"Ukrayna ən azı mülki infrastruktura hücum etməməyi təklif etməkdə davam edir. Və biz Moskvadan dəqiq cavab gözləyirik. Buna necə nail olmaq barədə istənilən şəkildə danışmağa hazırıq", - o deyib.

Zelenski bildirib ki, Ukrayna nümayəndə heyəti Böyük Britaniya, Fransa və ABŞ ilə atəşkəs danışıqları üçün aprelin 23-də Londona gedəcək.

Zelenski "Biz mümkün qədər konstruktiv şəkildə irəliləməyə hazırıq" deyib.

Zorakılığın dayandırılmasının məsuliyyətinin Rusiyanın üzərinə düşdüyünü deyən Zelenski əlavə edib: “Əgər səssizlik yoxdursa, Rusiyanın səssizlik əmri verməməsi səbəbindən yoxdur".

Trampın "ümidləri"

Putinin atəşkəs elanı Trampın cümə günü iki tərəfin razılığa gəlmədiyi təqdirdə ABŞ-ın müharibəni dayandırmaq səylərini dayandıracağını söyləməsindən sonra edildi.

ABŞ prezidenti aprelin 20-də iki tərəfin tezliklə razılığa gələ biləcəyinə ümid etdiyini bildirib, lakin təfərrüat verməyib.

Tramp "Truth" sosial platformasında “Ümid edirəm ki, Rusiya və Ukrayna bu həftə razılaşma əldə edəcəklər” deyib.

Xatırladaq ki, Tramp keçən ay tam və qeyd-şərtsiz atəşkəs təklif etdi, Ukrayna bunu qəbul etdi, lakin Putin bunu rədd etdi.

Aprelin 21-də Trampın şərhləri ilə bağlı suala Kremlin sözçüsü Dmitri Peskov Moskvanın “ABŞ-ın səylərinin nəticə verəcəyinə ümid etdiyini” deyib, lakin danışıqların vaxtı ilə bağlı açıqlama verməkdən imtina edib.