Rusiyanın xarici işlər naziri Sergey Lavrov aprelin 24-də açıqlama verərək deyib: "Moskva Ukraynadakı müharibə ilə bağlı razılığa gəlməyə hazırdır".
Lavrov bu bəyanatı ABŞ prezidenti Donald Trampın Rusiya prezidenti Vladimir Putini hücumları dayandırmağa çağırmasından sonra verib. Trampın çağırışı Kiyevə son aylar ərzində ən qanlı hücumlardan sonra göstərilən nadir tənqid kimi diqqətləri cəlb edib.
Lavrov "CBS News"a müsahibəsində deyib: “Biz razılığa gəlməyə hazırıq, lakin hələ də işlənilməsi lazım olan bəzi konkret məqamlar var və hazırda onlarla məşğuluq”.
Trampın xüsusi nümayəndəsi Steve Vitkoffun Putinlə atəşkəs danışıqları aparmaq üçün aprelin 24-də Rusiyaya gedəcəyi gözlənilir. Lavrov bəyan edib ki, danışıqlar prosesi düzgün istiqamətdə gedir və Vaşinqtonla danışıqlar davam etdiriləcək.
Lavrov ABŞ prezidentinin “dünyada bu vəziyyətin köklü səbəblərini aradan qaldırmağın zəruriliyini dərk edən yeganə lider” olduğunu deyib, lakin Trampın “razılaşmanın elementlərini aydın şəkildə göstərmədiyini” qeyd edib.
Tramp isə öz növbəsində aprelin 24-də səhər Kiyevə edilən və ən azı 12 nəfərin ölümü ilə nəticələnən raket və dron hücumlarından sonra birbaşa Putinə müraciət edib. Bu hücumlar Trampın qan tökülməsini tez bir zamanda dayandırmaq səylərinə baxmayaraq, Rusiyanın mülki əhalini hədəf alan bir sıra hava hücumlarından biridir.
Tramp sosial şəbəkədə etdiyi paylaşımda deyib: "Rusların hücumlarından məmnun deyiləm. Bu hücumlar lazımsız və pis bir zamanda həyata keçirilib. Vladimir DAYAN!" Rusiya tərəfdarı olduğu iddia edilən Tramp Ukrayna prezidenti Volodimir Zelenskini də tez-tez tənqid edib.
Jurnalistlərin Moskvanın müharibəni bitirmək üçün danışıqlarda hansı güzəştlərə gedəcəyi ilə bağlı sualına Tramp deyib: “Bütün ölkəni ələ keçirməkdən imtina etmək olduqca böyük güzəştdir”.
Qeyd edək ki, Rusiya 2022-ci ildə Ukraynaya tam miqyaslı işğala başlamağa, ölkəni bir neçə gün ərzində ələ keçirməyə ümid edirdi, lakin o vaxtdan bəri hər iki tərəf üçün böyük itkilərlə nəticələnən qanlı çıxılmaz vəziyyətə düşdü.
Krım məsələsi
Zelenski son hücumlardan sonra Cənubi Afrikaya səfərini yarımçıq dayandırıb və Kiyevə qayıdıb. O, Kiyevin müttəfiqlərinin Putinə tam və qeyd-şərtsiz atəşkəsə təzyiq etmək üçün kifayət qədər iş görüb-görməmələri ilə bağlı açıqlamalar verib.
“Rusiyaya qarşı hər hansı güclü təzyiq və ya yeni sanksiyalar paketi görmürəm”, - deyən Zelenski Trampın əvvəllər Moskvanı münaqişəni dayandırmayacağı təqdirdə nəticələri barədə xəbərdar etdiyini xatırladıb. Tramp aprelin 24-də Zelenskini Rusiyanın Krımla bağlı iddialarını tanımaqdan imtina edərək sülh səylərinə mane olmaqda ittiham edib. ABŞ prezidenti deyib ki, Krım "illər əvvəl itirilib".
Xatırladaq ki, Moskva Krım yarımadasını 2014-cü ildə ilhaq edib. “Biz tərəfdaşlarımızın təklif etdiyi hər şeyi edirik; sadəcə olaraq qanunlarımıza və Konstitusiyamıza zidd olan işləri görə bilmərik”, - deyə Zelenski Krımla bağlı suala cavabən deyib.
Buna cavab olaraq NATO-nun Baş katibi Mark Rutte aprelin 24-də bildirib ki, danışıqlarda Kiyev deyil, Moskva irəliləməlidir. Rutte Ağ Evdə Trampla görüşündən sonra jurnalistlərə deyib ki, “top indi açıq şəkildə Rusiyanın meydançasındadır”.
“Dağıntılar altından meyitlər çıxarılıb”
Rusiya aprelin 23-ü gecəsi və 24-də səhər saatlarında Ukrayna ərazisinə ən azı 70 raket və 145 pilotsuz uçan aparat atıb. Ukrayna Hərbi Hava Qüvvələrinin məlumatına görə, bu hücumların əsas hədəfi Kiyev olub.
"Kiyevin Svyatoşinski rayonunda ölənlərin sayı 12-yə, yaralıların sayı isə 90-a çatıb", - Ukraynanın Fövqəladə Hallar üzrə Dövlət Xidməti bildirib. Agentlik həmçinin qeyd edib ki, Rusiya Ukraynanın müdafiə sənayesini, o cümlədən raket yanacağı və barıt istehsal edən obyektləri hədəfə alıb.
"Biz yalnız hərbi hədəfləri və ya hərbi məqsədlər üçün istifadə edilən mülki obyektləri hədəfə alırıq. Əgər bu, Ukrayna ordusunun istifadə etdiyi hədəfdirsə, Müdafiə Nazirliyi və sahədəki komandirlərin bu hədəflərə hücum etmək hüququ var", - Lavrov "CBS News" edilən hücumlar barədə suala cavab verərkən deyib.
Ukrayna Rusiyanın üç illik təcavüzü müddətində hava hücumlarına məruz qalıb, lakin digər şəhərlərə nisbətən daha güclü hava hücumundan müdafiə sistemi olan Kiyevə hücumlar daha nadirdir.
Ukrayna lideri Zelenski bildirib ki, Rusiya hücumlarda Şimali Koreya istehsalı olan ballistik raketdən istifadə edib. Kiyevdə yaşayan 33 yaşlı hüquqşünas Olena Davydiuk AFP-yə bildirib ki, pəncərələr sındırılıb, qapılar “yerindən çıxıb”. İnsanlar dağıntılar altından çıxarılır.
Kiyev hücumlarından sonra Zelenski bildirib ki, cümə axşamı Rusiya qüvvələri Ukrayna mövqelərinə də hücum edib. Zelenski "X" platformasında yazıb: "Əsasən, ruslar kütləvi hücumdan istifadə edərək, hücuma keçməyə çalışdılar. Bizim qüvvələrimizin əksəriyyəti raket və dron hücumlarından müdafiəyə yönəldiyi halda, ruslar qurudan hücumlarını əhəmiyyətli dərəcədə gücləndirdilər".
