Tehran və Vaşinqton daha əvvəl Oman və İtaliyada iki dəfə görüş keçiriblər. Pekindən verilən rəsmi açıqlamaya görə, İranın xarici işlər naziri Abbas Ərakçi Çinə bir günlük səfər edəcək.

Ərakçinin Çinin xarici işlər naziri Vanq Yi ilə görüşmək üçün Pekinə səfəri İranın Omanın vasitəçiliyi ilə ABŞ ilə birbaşa və dolayı yolla nüvə danışıqları apardığı bir vaxta təsadüf edir. Çin Xarici İşlər Nazirliyi səfərin Vanq Yinin dəvəti ilə həyata keçirildiyini bildirib.

Tehran və Vaşinqton danışıqların ilk mərhələsini Omanın paytaxtı Maskatda, sonra isə İtaliyanın paytaxtı Romada keçirib. Tramp administrasiyası iki tərəfin “çox yaxşı irəliləyiş əldə etdiyini”, Ərakçi isə danışıqları “konstruktiv və müsbət” adlandırıb. Məlumata görə, Tehran və Vaşinqton arasında danışıqların üçüncü raundu aprelin 26-da Omanda keçiriləcək.

Aprelin 13-də Maskatda başlayan vasitəli nüvə danışıqlarında əsas diqqət İranın nüvə proqramında olub, tərəflər isə Oman vasitəsilə əlaqə saxlayır.

ABŞ prezidenti Donald Tramp keçmiş Obama administrasiyasının 2015-ci ildə imzaladığı sazişin yerinə yeni nüvə sazişi imzalanmadığı təqdirdə İrana qarşı hərbi əməliyyatlara başlayacağı ilə hədələyib. Lakin Tehran Vaşinqtonla “ictimaiyyətin qarşısında müzakirə aparmayacağında” israr edib.