İranın Xarici işlər naziri Abbas Əraqçi aprelin 30-da bildirib ki, İran mayın 2-də Romada Britaniya, Fransa və Almaniya ilə nüvə danışıqları aparacaq. Bu görüşün məqsədi rəsmi Tehran və Vaşinqton arasında yüksək səviyyəli nüvə danışıqları zamanı gərgin münasibətləri normallaşdırmaqdır.
Bu görüş İtaliyada keçiriləcək İran və ABŞ arasında dördüncü nüvə danışıqları raundundan əvvəl baş tutacaq. Əraqçi dövlət mediasına verdiyi açıqlamada deyib: “Mənim fikrimcə, üç Avropa ölkəsi nüvə məsələsində qəbul etdikləri yanlış siyasət üzündən rollarını itiriblər. Əlbəttə, biz bunu istəmirik və Romada onlarla da danışıqlar aparmağa hazırıq.”
Qeyd edək ki, “Reuters” 27 apreldə xəbər verib ki, Tehran Avropa ölkələri ilə görüşməyi təklif edib. Bu ölkələr E3 olaraq tanınan və ABŞ prezidenti Donald Trampın 2018-ci ildə ilk müddətində tərk etdiyi İranın 2015-ci il nüvə sazişinin tərəfləridir. E3-ün siyasi direktorları 2 mayda İranla görüşəcəklərini təsdiqləyiblər. Tramp İran yeni nüvə sazişi ilə razılaşmayacağı təqdirdə ona hücum edəcəyini bildirib. ABŞ-ın geri çəkilməsindən sonra İran 2015-ci il sazişinin nüvə proqramına qoyduğu məhdudiyyətləri xeyli aşıb və Avropa ölkələri rəsmi Vaşinqtonun Tehranın atom bombası əldə edə biləcəyinə dair narahatlığını paylaşır.
İran isə nüvə proqramının dinc məqsədli olduğunu bildirir. 2015-ci il sazişini təsdiqləyən BMT Təhlükəsizlik Şurasının qətnaməsi 2025-ci ilin oktyabr ayında qüvvədən düşəcək. Fransa Xarici işlər naziri aprelin 29-da bildirib ki, Paris danışıqlar uğursuz olarsa, beynəlxalq sanksiyaları yenidən tətbiq etməkdən çəkinməyəcək.
“Bu sanksiyalar İranın texnologiya, investisiya və Avropa bazarına çıxışını daimi olaraq bağlayacaq və ölkənin iqtisadiyyatına dağıdıcı təsir göstərəcək,” - deyə Jan-Noel Barrot bildirib. İranın BMT-dəki nümayəndəsi isə cavab verib: “Əgər Fransa və onun tərəfdaşları həqiqətən diplomatik həll yolu axtarırsa, təhdid etməyi dayandırmalıdırlar.”
Xatırladaq ki, aprelin 29-da ABŞ Maliyyə Nazirliyi İran və Çində yerləşən və İran İslam İnqilab Mühafizləri Korpusuna ballistik raket yanacağı tərkibləri əldə etməkdə ittiham olunan bir şəbəkəyə yeni sanksiyalar tətbiq edib. Əraqçi bildirib ki, “Danışıqlar zamanı ABŞ-ın tətbiq etdiyi sanksiyalar “yanlış mesaj” göndərir. Tramp İranın nüvə bombası əldə etməsinin qarşısını alacaq yeni bir saziş qazanılacağına əmin olduğunu deyib.
