“Baykar-Leonardo” müqaviləsi Türkiyə-İtaliya müdafiə əməkdaşlığında əhəmiyyətli bir irəliləyişdir. Bu razılaşma “Baykar”ın Avropa bazarlarında təsirini genişləndirir və onun NATO ilə birləşməsinin daha da güclənməsinə işarədir

Türkiyənin böyük pilotsuz uçuş aparatları (PUA) şirkəti “Baykar” İtaliyanın müdafiə nəhəngi “Leonardo” ilə əhəmiyyətli ilkin protokol imzaladı. Bu razılaşmaya əsasən, İtaliya ilə artan strateji əlaqələr Türkiyənin qlobal müdafiə sektorundakı təsirini genişləndirməsi baxımından yeni bir mərhələdir.

PUA ilə birlikdə yüksək texnologiyaların inkişaf və istehsalatını əsas alan bu müqavilə aprelin 29-da Romada Türkiyə prezidenti Rəcəb Tayyib Ərdoğan və İtaliyanın baş naziri Corca Meloninin həmsədrliyi ilə keçirilən IV Türkiyə-İtaliya Hökumətlərarası Zirvə toplantısında imzalanan bir sıra protokollar arasında idi.

“Baykar-Leonardo” razılaşması bu sammitin əsas məqamlarından biri kimi diqqətləri cəlb edərək iki NATO müttəfiqi arasında müdafiə sahəsində əməkdaşlığın dərinləşdirilməsi istiqamətində mühüm bir addımı olaraq görülə bilər. Hələ ilkin mərhələdə olan bu protokol hər iki ölkənin birgə texnoloji irəliləyişini dərinləşdirmək niyyətində olduğunu göstərir və sürətlə inkişaf edən PUA və aerokosmik sahələrdə yeni imkanların yaradılmasını vəd edir.

Qeyd edək ki, “Bayraktar TB2” və daha təkmil “Akıncı” PUA istehsalı ilə tanınan “Baykar” qlobal PUA ixracatında lider mövqeyə sahibdir. Şirkət öz sistemlərini 30-dan çox ölkəyə satıb və Ukrayna, Liviya və Qarabağ kimi münaqişələrdə effektivliyi ilə beynəlxalq diqqəti cəlb edib.

“Baykar”ın Avropaya yayılmaqdadır

“Leonardo” ilə müqavilə “Baykar”ın İtaliya aerokosmik şirkəti “Piaggio Aerospace”i satın almasından bir neçə ay sonra əldə olunub. Bu alış Avropa müdafiə sahəsində xeyli maraq doğurub. Məlumata görə, “Baykar”ın bu addımı Avropada varlığını qorumaq və Aİ müdafiə bazarına çıxış əldə etmək səylərinin bir hissəsi kimi şərh edilib.

Bildirilir ki, “Baykar-Leonardo” razılaşmasına əlavə olaraq Türkiyə və İtaliya arasında ticarət, sənaye investisiyaları, kosmik əməkdaşlıq, sosial xidmətlər, nəqliyyat, mədəniyyət və idman kimi sahələrdə də bir sıra anlaşma memorandumu imzalanıb.