Xarici işlər naziri Hakan Fidan verdiyi açıqlamada Türkiyə və Əlcəzairin xüsusilə regional diplomatiya, ticarət və humanitar mövzularda strateji tərəfdaşlıqlarını inkişaf etdirməkdə qərarlı olduqlarını bildirib.
Hakan Fidan aprelin 21-də Əlcəzair prezidenti Əbdülməcid Tebbun ilə görüşündən sonra Ankara ilə Əlcəzair arasında daha geniş məsləhətləşmələrin aparılmasının vacibliyini vurğulayıb.
“Türkiyə və Əlcəzair olaraq regional məsələlərlə bağlı məsləhətləşmələrimizi intensivləşdirmək və ortaq siyasətlər hazırlamaq istəyirik”, -deyə Hakan Fidan qeyd edib.
Xarici İşlər Nazirliyinin rəhbəri hər iki ölkənin də Qəzzadakı müharibə daxil olmaqla bir çox qlobal məsələlərdə ortaq baxışının olduğunu bildirib.
Qəzza və Fələstin həmrəyliyi mövzusunda birgə mövqe
Hakan Fidan Qəzzadakı vəziyyəti soyqırım kimi qiymətləndirib və hər iki ölkənin Fələstinə dəstəyini bir daha təsdiqləyərək deyib ki, humanitar yardımın çatdırılması və Qəzzada atəşkəsin əldə edilməsi prioritetlərimizdəndir. Türkiyə bundan sonra da qəti şəkildə qardaş Fələstin xalqının yanında olacaq. Fələstin məsələsini müdafiə etdikləri üçün əlcəzairli qardaşlarımıza bir daha təşəkkür edirəm.
Prezidentin səfəri gündəmdədir
Fidan prezident Tebbunun bu il Türkiyəyə səfər edəcəyini və növbəti Yüksək Səviyyəli Strateji Əməkdaşlıq Toplantısına qatılacağını açıqlayıb.
Bu səfərin ikitərəfli əlaqələri daha da möhkəmləndirəcəyi bildirilib.
Hakan Fidan Tebbunun rəhbərliyi altında Əlcəzairin qlobal diplomatiyada və regional sabitliyin təmin edilməsində artan rolunu yüksək qiymətləndirərək deyib:
"Əlcəzair bu regionda sabitliyin zəmanətçilərindən birinə çevrilib. Əlcəzairin BMT Təhlükəsizlik Şurasının qeyri-daimi üzvü kimi fəaliyyətini, həmçinin Əlcəzairin regional prioritetlərin qlobal səviyyədə təmsil olunmasında uğurunu alqışlayırıq".
Güvən ikitərəfli münasibətlərin əsasını təşkil edir
Fidan Türkiyə ilə Əlcəzair arasında güclü münasibət olduğunu vurğulayaraq, qarşılıqlı etimadın ikitərəfli əlaqələrin təməl daşı olduğunu bildirib.
"Əlcəzairə hər sahədə güvənirik. Türkiyə həmişə Əlcəzairin etibarlı dostu olaraq qalacaq", -deyə xarici işlər naziri deyib.
Fidan əlavə edib ki, Əlcəzairin xarici işlər naziri Əhməd Attaf və prezident Tebbun ilə görüşləri əməkdaşlıq üçün güclü iradənin Əlcəzair tərəfində də mövcud olduğunu təsdiqləyib.
İqtisadi və strateji tərəfdaşlıqların gücləndirilməsi
Aprelin 21-də keçirilən Birgə Planlaşdırma Qrupu Toplantısında iki ölkənin nümayəndə heyətləri ticarət, nəqliyyat, səhiyyə və miqrasiya kimi müxtəlif sahələrdəki imkanları qiymətləndirib.
Fidan Türkiyənin 1000-dən çox şirkətinin Əlcəzair iqtisadiyyatına və məşğulluğa töhfə verdiyini qeyd edərək və ikitərəfli ticarət həcmini 10 milyard dollara çatdırmaq potensialına diqqət çəkərək deyib:
“Ticarət və investisiyaların qarşılıqlı təşviqi üçün imzalanacaq sazişlər vasitəsilə iqtisadi əlaqələrimizi daha da genişləndirəcəyik”.
Hakan Fidan həmçinin enerji və müdafiə sahələrini əməkdaşlığın əsas istiqamətləri kimi qeyd edib:
"Əlcəzair ilə bu sahələrdəki əməkdaşlığımızı daha da gücləndirmək və davam etdirmək istəyirik".
