Rusiya prezidenti Vladimir Putin aprelin 28-də verdiyi açıqlamada Şimali Koreyaya ötən ilin avqustunda Ukraynanın etdiyi hücum nəticəsində ələ keçirilən Kursk sərhəd bölgəsinin geri alınmasında göstərdiyi dəstəyə görə Moskvanın minnətdarlığını bir daha təkrarlayıb.
Kremlin bəyanatında Şimali Koreya ordusunun Ukrayna qoşunlarının sərhəd bölgəsindən çıxarılmasında təsirli rol oynadığı vurğulanıb və bu dəstəyin “beynəlxalq hüquqa” və 2024-cü ilin noyabrında Moskva ilə Pxenyan arasında imzalanmış strateji tərəfdaşlıq sazişinə “tam uyğun” olduğu bildirilib.
"Koreyalı dostlarımız həmrəylik, ədalət və əsl yoldaşlıq hissi ilə hərəkət etdilər. Biz bunu çox yüksək qiymətləndiririk və Şimali Koreya lideri Kim Çen İna və Koreya Xalq Demokratik Respublikasının bütün rəhbərliyinə və xalqına ürəkdən minnətdarıq", -deyə Putin əlavə edib.
Şimali Koreya əsgərlərinin “qəhrəmanlıq, yüksək səviyyəli xüsusi hazırlıq və fədakarlıq” nümayiş etdirdiklərini deyən Putin “vəzifələrini şərəf və cəsarətlə yerinə yetirərək unudulmaz şöhrət qazandıqlarını” dilə gətirib. Həmçinin bildirilib ki, iki ölkə arasında dostluq, qonşuluq və əməkdaşlıq “döyüş meydanında möhkəmlənən əlaqələr”lə bütün sahələrdə uğurla və dinamik şəkildə inkişaf etməyə davam edəcək.
Aprelin 27-də Rusiya Silahlı Qüvvələrinin Baş Qərargah rəisi Valeri Gerasimov ölkəsinin Kursk sərhəd bölgəsinə nəzarəti bərpa etdiyini açıqlayıb və ərazidə hərbi əməliyyatlarda iştirak edən Şimali Koreya əsgərlərinə təşəkkür edib. Bu bəyanat Pxenyanın 2022-ci ilin fevralında başlayan Rusiya-Ukrayna müharibəsində iştirakının ilk rəsmi təsdiqidir.
