Ministri i Punëve të Jashtme dhe Tregtisë i Hungarisë, Peter Szijjarto, në një video të publikuar në rrjetet sociale, mbrëmë dënoi fuqishëm ndërhyrjen e fuqive të huaja në politikën e brendshme të Hungarisë.

Ai tërhoqi vëmendjen mbi faktin se Brukseli synon të vazhdojë të ndërhyjë në punët e brendshme të vendeve anëtare dhe përpiqet të ndikojë në fatin e Hungarisë përmes vendimeve që kontrollohen nga qeveria hungareze.

“Brukseli gjithashtu dëshiron të ndërhyjë në punët e brendshme të vendeve anëtare, dhe kjo ndodh edhe në Hungari, ku tashmë kanë caktuar kë duan të shohin në qeveri,” tha Szijjarto, sipas portalit Hirado.

Ministri hungarez deklaroi se Budapesti është kundër që paratë e taksapaguesve evropianë të përdoren për ndërhyrje në politikën e brendshme dhe bëri të qartë se BE-ja nuk mund të pranojë vendime që cenojnë sovranitetin e vendeve anëtare.

“E refuzojmë këtë. Refuzojmë që Brukseli të shpenzojë paratë e taksapaguesve evropianë për ndërhyrje në politikën e brendshme, kudo në botë,” shtoi Szijjarto.

Ai theksoi se, ndonëse shpesh ka kritika për ndërhyrjen e ShBA-së në punët evropiane, në të vërtetë nën presidencën e Donald Trump, qeveria amerikane e përfundoi praktikën e përpjekjeve për të ndikuar në proceset politike të vendeve të tjera përmes fondeve financiare.

“Kam dëgjuar ankesa qesharake për mënyrën se si Shtetet e Bashkuara ndërhyjnë në punët e brendshme të vendeve të ndryshme evropiane. Mendoj se kjo është qesharake, sepse presidenti Donald Trump e përfundoi ndërhyrjen e ashpër të qeverisë amerikane në proceset politike të brendshme të shumë vendeve nëpër botë përmes burimeve financiare amerikane,” tha Szijjarto.

Ai pretendon se para zgjedhjeve parlamentare hungareze të vitit 2022, nga ShBA-ja, nën udhëheqjen e mëparshme, janë marrë 10 milionë dollarë për të mbështetur fushatën e opozitës.