Presidenti amerikan Donald Trump theksoi të hënën rëndësinë e bisedimeve të paqes Rusi-Ukrainë të kësaj jave në Türkiye, duke shtuar se ai mendon se "gjëra të mira mund të dalin" nga bisedimet.

"Takimi i së enjtes me Rusinë dhe Ukrainën është shumë i rëndësishëm", tha Trump në një konferencë për shtyp. "Unë isha shumë këmbëngulës që takimi të zhvillohej."

Ai shprehu optimizëm për rezultatin e bisedimeve, duke thënë: "Mendoj se gjëra të mira mund të dalin nga ai takim."

"Mos e nënvlerësoni" takimin e së enjtes, kërkoi Trump, duke lavdëruar Presidentin turk Recep Tayyip Erdoğan si "një mikpritës të shkëlqyer".

"Po mendoja të fluturoja për në Türkiye" për takimin, tha ai, duke shtuar se mund të udhëtonte për në Türkiye "nëse mendoj se gjërat mund të ndodhin".

Duke theksuar koston "e egër" njerëzore të konfliktit të vazhdueshëm, ai e përshkroi atë si "një formë krejt të re lufte".

Trump kërkoi që t’i jepet fund “gjakderdhjes së tmerrshme” në Ukrainë, duke thënë se njerëzit “po vriten në nivele që nuk i kemi parë që nga Lufta e Dytë Botërore”.

Bisedimet për paqe janë planifikuar të zhvillohen në Istanbul, Türkiye, me Presidentin ukrainas Volodymyr Zelensky që ka pranuar propozimin e Moskës për t’i rifilluar bisedimet e paqes pas një ndërprerjeje të gjatë.

Erdoğan ka mirëpritur mbështetjen e homologut të tij rus Vlladimir Putin për rifillimin e procesit nga vendi ku u ndal në Istanbul në mars 2022, duke riafirmuar angazhimin e Türkiyes ndaj përpjekjeve për paqe.