Кинеските законодавци денес на седницата на Постојаниот комитет на Националниот народен конгрес (ННК) усвоија закон посветен на унапредување на приватниот сектор во земјата, што е првиот основен закон во Кина посветен на развојот на приватниот сектор.

Законот, кој ќе стапи на сила на 20 мај, се состои од девет поглавја и 78 членови, кои опфаќаат општи одредби, фер конкуренција, промоција на инвестиции и финансирање, технолошки иновации, стандардизирани операции, заштита на права и интереси, законски одговорности и други релевантни теми, пренесува Синхуа.

Ли Чанганг, професор на Кинеската академија за студии за отворена економија при Универзитетот за меѓународен бизнис и економија, за „Глобал тајмс“ изјави дека новиот закон „носи важни практични импликации за промовирање на развојот на приватниот сектор, насочувајќи го по пат базиран на закон и подобрувајќи ја неговата регулатива и управување“.

Ли додаде дека донесувањето на овој закон ќе помогне да се обезбеди пофер конкурентна средина за приватните претпријатија и дополнително ќе го поттикне нивниот ентузијазам за иновации и создавање бизнис.

Блумберг наведува дека врз основа на овој закон, приватните компании во Кина ќе имаат ист третман како и државните компании во однос на инвестициите, финансирањето и поддршката за технолошки иновации.

Законот, исто така, вклучува клаузула што забранува прекумерни казни за приватни компании.

Кинеските власти сакаат да го зајакнат приватниот сектор за да го заштитат планираниот економски раст во екот на царинскиот конфликт со Соединетите Американски Држави, додава агенцијата Њујорк.