Израел не може да биде принуден да ѝ дозволи на Агенцијата на Обединетите нации за палестински бегалци (УНРВА) да работи во Газа, соопштија денес САД на сослушувањето одржано во Меѓународниот суд на правдата (МСП) во Хаг.

САД изјавија дека Израел има право да одлучува кои организации можат да обезбедат основни потреби за населението на окупираните палестински територии, пренесува Ројтерс.

„Окупаторската сила има одреден степен на дискреција кога станува збор за тоа кои хуманитарни програми ги дозволува“, рече правниот советник на Стејт департментот, Џошуа Симонс.

Како што наведе тој, дури и ако организацијата што обезбедува помош е непристрасна хуманитарна организација и дури и ако е еден од клучните актери, тоа не ја обврзува окупаторската сила да дозволи и олесни спроведувањето на хуманитарната помош од страна на таа организација.

Симонс, исто така, ги истакна сериозните сомнежи што ги има Израел во врска со непристрасноста на УНРВА.

Претставници на ОН и Палестинците го обвинија Израел, на сослушување во понеделник, за кршење на меѓународното право со тоа што не дозволил испорака на помош во Газа.

Од 2 март, Израел целосно ги прекина снабдувањата за 2,3 милиони жители на Појасот Газа, а залихите од храна собрани за време на прекинот на огнот на почетокот на годината речиси целосно исчезнаа.

Израел минатата година донесе закон со кој ѝ се забранува на УНРВА да работи во земјата, наведувајќи дека организацијата вработувала членови на Хамас кои учествувале во нападите врз Израел на 7 октомври 2023 година.

ОН во август соопшти дека девет членови на персоналот на УНРВА можеби биле вмешани во нападите и дека биле отпуштени.

Шефот на УНРВА, Филип Лазарини, вчера го осуди третманот на Израел кон хуманитарните работници во Газа, наведувајќи дека десетици вработени во таа агенција биле приведени и злоставувани, објави Ал Џезира.

„Од почетокот на војната во октомври 2023 година, повеќе од 50 вработени на УНРВА, вклучувајќи наставници, лекари и социјални работници, беа притворени и злоставувани. Тие беа третирани на најшокантен и нечовечки начин“, рече Лазарини.