Унгарскиот министер за надворешни работи Петер Сијарто денес ги отфрли обвинувањата на Украинската служба за безбедност (СБУ) за разоткривањето на шпионската мрежа на унгарската воена разузнавачка служба во регионот Закарпатија во Украина.

„Би ги замолил сите да бидат внимателни во врска со ваквите извештаи што се појавуваат во украинската пропаганда. Доколку добиеме какви било детали или официјални информации, тогаш ќе разговараме за тоа. Дотогаш, морам да го класифицирам ова како пропаганда што мора да се третира со претпазливост“, рече Сијарто, пренесува Ројтерс.

Според информациите за истрагата објавени од СБУ, задачата на унгарската шпионска мрежа била да собира информации за воената безбедност на регионот, истражувајќи ги ранливостите во копнената и воздушната одбрана, како и социо-политичките ставови на локалното население.

Посебен фокус беше ставен на истражување на реакциите на евентуалното влегување на унгарските трупи во регионот.

Истрагата покажа дека агентите работеле под надзор на унгарски воени разузнавачки службеници.

Сите осомничени беа обвинети за предавство според воена состојба и се соочуваат со доживотен затвор со конфискација на имот.

Операцијата беше спроведена под надзор на државното обвинителство, а СБУ ја продолжува истрагата.