Украинскиот боксер Александар Усик и Британецот Даниел Дубоа постигнаа договор за натпревар за обединување на титулите за светски шампион во тешка категорија, кој ќе се одржи на 19 јули на стадионот Вембли во Лондон, јавува Би-Би-Си.

Дубоа е светски шампион во категоријата ИБФ, додека Усик е сопственик на титулите ВБО, ВБА и ВБЦ.

Усик на 19 мај 2024 година го победи Британецот Тајсон Фјури во Ријад и ги обедини титулите светски шампион во тешка категорија на ВБА, ВБО, ИБФ и ВБЦ. Украинецот потоа во јуни 2024 година објави дека се откажал од одбраната на титулата во ИБФ, а Дубоа беше прогласен за шампион.

Дубоа го одбрани својот појас во ИБФ во септември минатата година, откако го победи сонародникот Ентони Џошуа.

Усик го победи Фјури во реванш на 22 декември минатата година и ги задржа светските титули во тешка категорија во ВБО, ВБА и ВБЦ.

„Му благодарам на Бога за можноста повторно да се борам за неоспорната титула. Ти благодарам, Даниел, што го заштити мојот појас во ИБФ- сега го сакам назад“, рече Усик.

Дубоа и Усик се бореа во 2023 година во Вроцлав, а украинскиот боксер победи.

„Требаше да ја добијам првата борба, но таа победа ми беше одземена со одлука на судијата. Овој пат нема да правам никакви грешки пред моите луѓе, на националниот стадион во мојот роден град. Сега сум супериорен и поопасен борец“, изјави Дубоа.