Најмалку уште 26 Палестинци се убиени денес во непрекинатите израелски воздушни напади врз домови низ Појасот Газа, соопштија локалните медиуми.

Израелските воени авиони рано утрово извршија напад врз куќа во јужниот град Кан Јунис, при што убиени се осум лица, објави палестинската новинска агенција Вафа.

Уште две лица се убиени во друг напад во кампот за раселени лица Ал-Шафии западно од градот, соопшти новинската агенција.

Борбени авиони изведоа напад на уште еден палестински дом во бегалскиот камп Џабалија во северна Газа, при што убиени се 10 лица.

Уште шест цивили се убиени, а неколку други се повредени во друг напад врз куќа во северниот град Беит Лахија, соопшти истиот извор.

Израелската Армија ги продолжи нападите врз Газа на 18 март, кршејќи го договорот за прекин на огнот и размена на затвореници од 19 јануари.

Израел уби над 52.200 Палестинци во енклавата од октомври 2023 година, повеќето од нив жени и деца.

Меѓународниот кривичен суд изминатиот ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува со случај за геноцид во Меѓународниот суд на правдата за воените дејствија во енклавата.