Кога еден кинески сопственик на фабрика се снимил себеси на ТикТок пред ѕид преполн со луксузни чанти и ги прашал американските потрошувачи: „Зошто едноставно не нè контактирате и нѐ купувате од нас?“, пораката започна нов модел на односи помеѓу двете најголеми економии во светот.
Трендот доби дополнителен импулс минатиот месец со повторното воведување на трговските ограничувања од ерата на Трамп, кои продолжија да ги зголемуваат цените на кинеските производи.
Соочени со ескалација на цените и царините до 145 проценти за многу кинески стоки, американските потрошувачи почнаа да бараат поевтини зделки. Тие ги заобиколија конвенционалните канали за малопродажба и увоз, свртувајќи се кон платформи како ДХгејт, Тему, Taoбao и TикТок Шоп за прифатливи зделки директно од Кина.
Растечката популарност стана очигледна во средината на април кога платформата за е-трговија ДХгејт скокна на второто место - зад само ЧетГПТ - додека друга кинеска платформа за онлајн купување Taoбao се искачи на петтото место од 47-мо место на табелата за бесплатно преземање на американската Ап Стор.
Инфлуенсерите го преплавија ТикТок со содржина што прикажува чанти, хеланки и патики наводно набавени директно од кинески фабрики. Некои дури и ги водат гледачите низ нивниот процес на купување, споделувајќи табели на производители. Дали овие добавувачи се легитимни производители на оригинална опрема (OEM) често е нејасно, но содржината постојано се повторува.
Царинската даночна дупка
Кинеските онлајн малопродажни гиганти ја користеа одредбата „де минимис“ за да испорачуваат евтини артикли директно во САД без да наплаќаат давачки или даноци за увоз. Ова долгогодишно правило дозволува влез на пакети под 800 долари без овие трошоци.
„Досега, многу кинески продавачи се потпираа на ослободувањето од де минимис според Член 321 од Законот за тарифи од 1930 година, кој им овозможува на стоките вредни под 800 долари да влезат во САД без царина ако се испратат директно до потрошувачите“, вели професорот Хенри Гао од Универзитетот за менаџмент во Сингапур.
Ова ослободување им овозможи на платформите како Тему, Шеин и TикТок Шоп да ги заобиколат стандардните тарифи со делење на пратките или искористување на воздушниот товар и со тоа олеснување на голем обем на директен кинески увоз.
TикТок, платформата за социјални медиуми во сопственост на кинеската компанија БајтДенс (ByteDance), стана клучна платформа за овој тренд.
Видеата што промовираат директни купувања од кинески фабрики на апликацијата скокнаа за речиси 250 проценти по воведувањето на тарифите.
Хаштаговите како #LuxuryExposed и #BuyingFromChina собраа милиони прегледи, а видеата честопати се поврзани со впечатливи наслови како „Трамп ја малтретираше погрешната земја“ или „Еве како се води трговска војна“.
Една американска инфлуенсерка, Елизабет Хензи, целосно навлезе и го сподели списокот на кинески производители. Нејзиниот број на следбеници на TикТок нагло се зголеми, што ѝ овозможи партнерство со ДХгејт.
„Гледањето како другите земји се здружуваат за да се обидат да им помогнат на американските потрошувачи ми го подигна моралот“, рече таа.
Кинеските производители, исто така, посочија дека нивното зголемено видео присуство на TикТок е директна реакција на падот на продажбата.
Ју Кјиуле, ко-сопственик на компанија за фитнес опрема во покраината Шандонг, рече дека почнал да објавува на ТикТок кон средината на март за да најде повеќе клиенти откако царините предизвикаа бран откажани нарачки.
Слично на тоа, Луис Лв, генерален директор за извоз во фабриката за накит Хонгје во Јиву, покраината Џеџијанг, изјави дека неговата компанија почнала да објавува на TикToк кон крајот на 2024 година поради намалување на домашната продажба. Сепак, тој истакна значителен пораст на прегледите на нивните видеа на TикToк откако администрацијата на Трамп ги објави царините.
„Филозофијата на кинеските бизнисмени е дека ќе одиме каде и да е бизнисот“, вели тој во едно интервју.
Истекување на правилото за бесцаринско пазарување
Сепак, овој поволен период завршува.
Долгогодишниот бесцарински пазар е затворен од страна на американскиот претседател Доналд Трамп. Додека поддржувачите велат дека правилото ги поедноставува царините и им користи на купувачите, и Трамп и претседателот Џо Бајден го критикуваа заради штета на американските бизниси и овозможување на шверц на нелегална стока, вклучително и дрога.
Белата куќа потврди на почетокот на април дека ослободувањето од де минимис ќе биде отстрането почнувајќи од 2 мај во 12:01 часот по источно време, што значи дека повеќето пакети директно од фабриката од Кина сега ќе се соочат со редовни царински давачки и потенцијално нови тарифи според Член 301.
Според зборовите на Гао, „Моделот директно од фабриката се соочува со значителни пречки“.
Пакетите во вредност помала од 800 долари ќе бидат предмет на данок од 120% или фиксна такса од 100 долари, која ќе се зголеми на 200 долари од јуни.
Во очекување на оваа промена на политиката, финансискиот шеф на Мета, Сузан Ли, во среда потврди дека „извозниците на е-трговија со седиште во Азија ги намалиле своите трошоци на платформи како Фејсбук и Инстаграм.
Подемот на „Патот на свилата на 21 век“?
Професорот Гао забележува дека, иако многу потрошувачи можеби не се свесни за деталите од тарифната политика, тие реагираат на „пониските цени и пократките синџири на снабдување“.
„Зголемувањето на директните купувања од фабрики преку платформи како ТикТок Шоп и Тему одразува и зголемената потрошувачка чувствителност на цените и стратешкото прилагодување од страна на кинеските фирми“, вели тој за TРТ Ворлд.
Гледајќи напред, овие случувања укажуваат на фундаментална трансформација во начинот на кој САД и Кина комерцијално соработуваат.
„На долг рок, ова сигнализира промена во трговијата меѓу САД и Кина - од трговија со контејнери во голем обем до фрагментирани, дигитализирани малопродажни текови - а сега потенцијално кон раздвојување или присилно пренасочување на синџирите на снабдување“, продолжува тој.
„Трговската стратегија на Вашингтон очигледно се развива за да ги третира дури и стоките за широка потрошувачка со ниска вредност како место на стратешка конкуренција.“
Поедноставно кажано, ова укажува на долгорочна промена во трговијата меѓу САД и Кина, преминувајќи од големи пратки кон индивидуални онлајн купувања, што потенцијално ќе доведе до поделба во трговијата или нови правци на снабдување, бидејќи САД сега ги сметаат дури и малите стоки за широка потрошувачка како геополитички важни.
Познат како Дунхуанг на кинески и наречен „Мала жолта апликација“ од страна на купувачите, ДХгејт исто така проактивно ја промени својата стратегија. Лансирана во 2004 година како Б2Б портал, платформата се реинвентираше во текот на изминатите пет години, насочувајќи се кон директна продажба до потрошувачите и социјална трговија. Нејзиниот основач, Ванг Шутонг, еднаш ја опиша визијата како градење на „Патот на свилата на 21 век“.
На почетокот на април, компанијата ја започна својата кампања „Залихи и заштеди“, насочена кон поврзување на купувачите со продавачите во услови на неизвесност во царините. Но без законското засолниште на де минимис, дури и евтините кинески стоки наскоро би можеле да станат помалку конкурентни.
„Освен ако кинеските продавачи не го преместат производството надвор од Кина или не воспостават дистрибутивни мрежи со седиште во САД, нивната предност во трошоците ќе еродира“, предупредува Гао.
Но времето истекува.
Видеата на ТикТок сè уште продолжуваат да прикажуваат стоки „директно од фабрика“, честопати по дел од малопродажните цени во САД. Дали тие се навистина легитимни - или одржливи - е прашање што ќе биде тестирано како што ќе стапат во сила новите трговски ограничувања.
