На конститутивната седница на новото свикување на Собранието на Косово пратениците не положија заклетва, не го избраа претседателот на Собранието и не гласаа за новата влада.

На седницата што ја водеше најстариот пратеник во салата, Авни Дехари, со 119 присутни во салата од вкупно 120, не беше одобрен извештајот на Комисијата за верификација на мандат и кворум.

Привремената комисија го достави извештајот до пратениците, барајќи да го изгласаат, за да се верификуваат мандатите на 120 пратеници избрани врз основа на списокот заверен од Централната изборна комисија (ЦИК).

Со 52 гласа за, 46 против и 11 воздржани, пратениците од Движењето Самоопределување и Социјалдемократската иницијатива гласаа за извештајот, а пратениците од Демократската партија на Косово (ПДК), Демократскиот сојуз на Косово (ЛДК) и Алијансата за иднината на Косово (ААК) беа против. Пратениците од Српската листа беа воздржани.

По паузата претседавачот најави прекин на седницата.

„Под овие околности, принудени сме да ја прекинеме седницата и со писмо да го известиме претседателот како понатаму“, рече Дехари.

Според избраниот претставник од пратеничката група на Движењето Самоопределување, Фатон Пеци, ова е нова околност во уставна и правна смисла и соодветно на тоа претседавачот на седницата одлучил да му се обрати на претседателот на Косово за следните чекори.

Конститутивната седница на Собранието на 1 април ја свика претседателката на Косово, Вјоса Османи, по средбата со лидерите на политичките партии.

Именувањето на претседателот на Собранието и заменик претседателот ќе го отвори патот за процесот на формирање на новата влада на Косово.

Гласањето на тројца членови на Социјалдемократската иницијатива за извештајот на Комисијата за верификација на мандати и кворум се сметаше за знак дека оваа партија ќе го поддржи формирањето на нова влада предводена од актуелниот премиер Албин Курти.

Партијата што победи на изборите на 9 февруари, Движењето Ветевендосје, кое го има првото право да формира нова влада, освои 48 пратенички места во Собранието, а потребна и е соработка со пратениците од другите партии за да добие 61 глас за формирање нова влада.