Унгарскиот парламент во вторник изгласа повлекување на земјата од Меѓународниот кривичен суд (МКС), објави министерот за надворешни работи Петер Сијарто

„Со оваа одлука, одбиваме да бидеме дел од политизирана институција која ја изгуби својата непристрасност и кредибилитет“, напиша Сијарто на платформата X.

Унгарија ја објави својата намера да се повлече од МКС на 3 април, кратко по пристигнувањето на израелскиот премиер Бенјамин Нетанјаху во четиридневна посета на Будимпешта.

Меѓународниот кривичен суд издаде налог за апсење на Нетанјаху за воени злосторства и злосторства против човештвото во Појасот Газа, каде што од октомври 2023 година се убиени повеќе од 50.500 луѓе.

Неговата посета на Унгарија беше негово прво пристигнување на европско тло откако беше издадена меѓународна потерница.

Организациите за човекови права, вклучувајќи ги Амнести Интернешнл и Хјуман рајтс воч, ја повикаа Унгарија да го уапси Нетанјаху и да го екстрадира во МКС, но унгарските власти не одговорија на овие повици.

Израел, исто така, се соочува со обвинение за геноцид пред Меѓународниот суд на правдата (МСП) поради војната во Газа.

Институциите во Газа изјавија дека најмалку 65 проценти од Палестинците убиени во израелската воена офанзива се жени, деца и стари лица.