Генералниот секретар на НАТО, Марк Руте, изјави денеска дека рускиот претседател Владимир Путин направил грешка што не испратил делегација на високо ниво на мировните преговори во Истанбул.

„Путин направи грешка со испраќањето делегација на пониско ниво. Всушност, топката е во негов двор, во смисла дека тој мора да игра, во смисла дека тој мора сериозно да се справи со наоѓањето мир, а целиот притисок е врз него“, изјави Руте пред самитот на Европската политичка заедница во Тирана.

Од друга страна, тој оцени дека е многу добро што украинските претставници седнаа на преговарачка маса и што Киев ја испрати очекуваната делегација за преговори за мир.

Тој, исто така, изрази задоволство од улогата на САД и напорите на претседателот Доналд Трамп за деблокирање на ситуацијата кога станува збор за мировните преговори меѓу Украина и Русија.

Руте вчера во Анталија ја нагласи важноста на улогата на Турција во посредувањето меѓу страните во конфликтот, особено во однос на способноста на Анкара да ги донесе страните на преговарачка маса.