Постигнувањето договор со САД за мир во Украина „не е лесно“, рече рускиот министер за надворешни работи, додека Москва и Вашингтон продолжуваат со контактите за изнаоѓање решение за ставање крај на војната, која трае повеќе од три години.

„Не е лесно да се договорат клучните компоненти на решението“, рече Лавров и додаде дека рускиот претседател Владимир Путин уште во јуни минатата година ги истакна очекувањата на Москва од потенцијалниот договор, и „оваа позиција не е некаков вид на барање“.

„Уште еднаш нагласувам, тоа е цврсто засновано на формулацијата на Повелбата на Обединетите нации, на бројни конвенции и на резултатите од референдумите, на резултатите од изразувањето на волјата на народот на засегнатите територии“, рече Лавров, мислејќи на украинските територии анектирани од Москва во 2022 година.

Коментирајќи ги мировните преговори со Вашингтон, Лавров рече дека „здравиот разум го води пристапот на администрацијата на американскиот претседател Доналд Трамп“.

Тој понатаму рече дека Русија и САД се обврзани да сторат сè, како „одговорни меѓународни актери“ за да обезбедат конфликтот на различни интереси да не ескалира во конфронтација.

„Ние сме должни да направиме се што е во наша моќ да не го пропуштиме моментот, оваа случајност да ја претвориме во заемно корисни проекти“, рече Лавров.

Рускиот министер за надворешни работи додаде дека Москва разбира како изгледа заемно корисен договор, како и договор што може да ја одведе Русија во „уште една стапица“.