Корисниците на вештачката интелигенција (ВИ) кои им дозволуваат на ботови да размислуваат на работа, го земаат полесниот пат, кој е штетен за нивниот ум, покажа новото истражување.

Истражувањето на 300 вработени во Мајкрософт, креаторот на системот за вештачка интелигенција Copilot, покажало „самопријавено намалување на когнитивниот напор“ на многу корисници кои користат вештачка интелигенција на работа на повеќе од 900 начини.

Доколку се користат „на погрешен начин, технологиите резултираат со намалување на когнитивните способности што треба да се зачуваат“, предупредуваат научниците во трудот што ќе биде претставен кон крајот на април и почетокот на мај на конференција за компјутери и човечки фактори во Јокохама, Јапонија.

„Поголемата доверба во вештачката интелигенција е поврзана со намаленото критичко размислување, а поголемата самодоверба со посилното критичко размислување“, тврди тим составен од научници од Универзитетот Карнеги Мелон.

Со други зборови, употребата на вештачка интелигенција може да резултира со тоа на луѓето да им останат секојдневни, едноставни задачи како проверка на често непредвидливото однесување на ботови, наместо когнитивно потешките задачи за креирање стратегии и решавање на проблеми, сугерира истражувањето.

„Генеративната вештачка интелигенција го менува критичкото размислување кон валидација на информации, интеграција на одговорите и управување со задачи“, објави тимот на Microsoft-CMU по евалуацијата на одговорите на своите вработени кои користеле ботови како ChatGPT за задачи како пишување е-пошта или прегледување на работата на нивните колеги.