Романскиот премиер Марсел Чолаку поднесе оставка во понеделник откако кандидатот на крајната десница, Ѓорѓе Симион, победи во првиот круг од повторените претседателски избори што се одржаа за време на викендот, додека кандидат на власта испадна од трката.

Привремениот претседател Илие Болојан ја прифати оставката на Чолачу, соопшти неговиот кабинет, додавајќи дека привремениот премиер ќе биде назначен во вторник.

Претходно, по состанокот на политичкиот совет на Романската Социјалдемократска партија (ПСД), чиј претседател е, Чолаку објави дека одлучил да поднесе оставка, наведувајќи го како причина поразот на Крин Антонеску, кандидат поддржан од коалициската влада, објави локалната телевизија Антена3.

Тој рече дека резултатите покажуваат дека владата го изгубила кредибилитетот.

„Наместо да му дозволам на идниот претседател да ме замени, решив самиот да поднесам оставка“, рече Чолаку.

Тој исто така објави дека ПСД нема да поддржи ниту еден кандидат во вториот круг од изборите, што ќе се одржи на 18 мај.

Симион победи со голема разлика во првиот круг, освојувајќи повеќе од 40,9 проценти од гласовите.

38-годишникот е познат по своите контроверзни изјави кои ги одразуваат неговите ултранационалистички и евроскептични ставови.

Тој ќе се соочи со Никусор Дан, центристичкиот градоначалник на главниот град Букурешт, кој го освои второто место на изборите со речиси 21 процент од гласовите.

На 24 ноември во Романија се одржа првиот круг од претседателските избори, на кои победи крајнодесничарскиот проруски кандидат Калин Ѓорѓеску.

Сепак, Уставниот суд на Романија ги поништи резултатите, како и вториот круг закажан за 8 декември, велејќи дека изборниот процес бил манипулиран во корист на Ѓеорѓеску од страна на кампања поддржана од Русија.