Израелската Армија од утринава уби најмалку уште 20 Палестинци во најновите воздушни напади врз Појасот Газа.

Официјалната палестинска новинска агенција Вафа, цитирајќи медицински извори, соопшти дека 15 лица се убиени, а 10 други се повредени во израелски воздушен напад врз стан во областа Ал-Карама, во северозападниот дел на Појасот Газа.

Четири други лица беа убиени, а петмина беа повредени во израелски воздушен напад врз куќа во населбата Салатин во градот Беит Лахија во северниот дел на Појасот Газа, додаде Вафа.

Уште една жртва е убиена во израелски напад со беспилотно летало врз група цивили во источната област Џабалија, во северниот дел на Газа.

Во меѓувреме, беа пријавени операции за уривање на палестински домови и згради од страна на израелската Армија во различни области на источниот дел на Газа и во Рафах, јужниот дел на Појасот Газа.

Според израелските медиуми, Владата на Бенџамин Нетанјаху вчера донела наредба за интензивирање на офанзивата во енклавата.

Повеќе од 52.500 Палестинци се убиени во Газа во бруталниот израелски напад од октомври 2023 година, повеќето од нив се жени и деца.

Меѓународниот кривичен суд во ноември минатата година издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради својата војна во енклавата.