ԱՄՆ նախագահ Դոնալդ Թրամփը ցանկանում է տեսնել մշտական հրադադար՝ Ուկրաինայում պատերազմը ամբողջությամբ կանգնեցնելու համար, հայտարարեց Սպիտակ տունը՝ արձագանքելով Ռուսաստանի միակողմանի երեքօրյա դադարին։

«Ես հասկանում եմ, որ Վլադիմիր Պուտինը այս առավոտ առաջարկել է ժամանակավոր հրադադար։ (ԱՄՆ) նախագահը հստակ նշել է, որ ցանկանում է տեսնել մշտական հրադադար՝ նախ՝ սպանությունները կանգնեցնելու, արյունահեղությունը դադարեցնելու համար։ Չնայած նա լավատես է, որ կարող է համաձայնության գալ, նա նաև իրատես է այս հարցում»,- լրագրողներին ասաց խոսնակ Կարոլայն Լևիթը երկուշաբթի։

«Երկու առաջնորդները պետք է նստեն բանակցությունների սեղանի շուրջ՝ այս իրավիճակից դուրս գալու համար։ Եվ ես կարծում եմ, որ նախագահը Ուկրաինայի նախագահ Վլադիմիր Զելենսկու հետ հանդիպելով ցույց է տալիս, որ մեծ ջանքեր և ժամանակ է ներդնում այս հարցում, քանի որ ցանկանում է լինել խաղաղության նախագահ»,- հավելեց նա՝ անդրադառնալով Թրամփի և Զելենսկու հանդիպմանը, որը տեղի ունեցավ Հռոմի պապ Ֆրանցիսկոսի հուղարկավորության ընթացքում։

Պուտինը երկուշաբթի հայտարարեց միակողմանի հրադադար Ուկրաինայում, քանի որ Մոսկվան պատրաստվում է նշել Երկրորդ համաշխարհային պատերազմի ընթացքում Նացիստական Գերմանիայի նկատմամբ Խորհրդային Միության հաղթանակի 80-ամյակը։ Ռուսաստանի առաջնորդը հրամայեց դադարեցնել բոլոր ռազմական գործողությունները Ուկրաինայում մայիսի 7-8-ի կեսգիշերից մինչև մայիսի 10-11-ի կեսգիշեր։

Ուկրաինան ի պատասխան հայտարարեց, որ Մոսկվան պետք է «անմիջապես» դադարեցնի ռազմական գործողությունները Ուկրաինայում, եթե ցանկանում է խաղաղություն։

«Եթե Ռուսաստանը իսկապես ցանկանում է խաղաղություն, ապա պետք է անմիջապես դադարեցնի կրակը։ Ինչու՞ սպասել մինչև մայիսի 8-ը։ Եթե կրակը կարելի է դադարեցնել հիմա և ցանկացած ամսաթվով՝ 30 օրով, ապա դա իրական է, ոչ միայն շքերթի համար»,- X-ում գրել է Ուկրաինայի արտգործնախարար Անդրիյ Սիբիխան։

Նա հավելեց, որ Ուկրաինան պատրաստ է աջակցել «տևական, ամուր և լիարժեք» հրադադարին՝ նշելով. «Սա այն է, ինչ մենք մշտապես առաջարկում ենք՝ առնվազն 30 օրով»։