Ուկրաինայի նախագահ Վլադիմիր Զելենսկին հայտարարել է, որ իր երկիրը ցանկանում է Միացյալ Նահանգների հետ ընդհանուր համաձայնություն զարգացնել այն մասին, որ Ռուսաստանը պատերազմում «ագրեսոր» կողմն է, և ընդգծել է, որ Կիևը Վաշինգտոնին համարում է իր հիմնական ռազմավարական գործընկեր։

«Մենք գիտենք, որ Միացյալ Նահանգները միջնորդի դիրքում է այս հակամարտության մեջ։ Սա Միացյալ Նահանգների ընտրությունն է», - ասել է Զելենսկին ամերիկացի լրագրող Բեն Շապիրոյի հետ հարցազրույցում, որը հաղորդել է «Ինտերֆաքս-Ուկրաինա» լրատվական գործակալությունը։

«Սակայն մենք Միացյալ Նահանգները տեսնում ենք որպես ազդեցություն ունեցող ռազմավարական գործընկեր», - հավելեց Զելենսկին։

Ուկրաինայի նախագահը նաև ասել է. «Մենք կարծում ենք, որ այս երկու ուժերը պետք է օգտագործվեն Ռուսաստանի դեմ, քանի որ Ռուսաստանը ագրեսոր է։ Եվ մենք կցանկանայինք ունենալ ընդհանուր ըմբռնում, որ ագրեսորը Ռուսաստանն է, այլ ոչ թե մենք»։

Զելենսկին ասել է, որ ընդունում է ԱՄՆ նախագահ Դոնալդ Թրամփի՝ այլ լուծման որոնումները։ «Ես հասկանում եմ, թե ինչ է ուզում նախագահ Թրամփը։ Ես հարգում եմ, որ նա փնտրում է հնարավոր լուծում։ Դա նրա ոճն է», - ասաց Զելենսկին՝ ընդգծելով, սակայն, որ Ուկրաինան չի ցանկանում, որ Վաշինգտոնը «հավասարակշռություն փնտրի» այս հարցում։

Զելենսկին նաև նշել է, որ Ուկրաինան թափանցիկ է ամերիկյան զենքի համակարգերի օգտագործման և զարգացման հարցում՝ ընդգծելով, որ ուկրաինացի փորձագետները բազմաթիվ տեխնոլոգիաներ են մշակում ԱՄՆ գործընկերների հետ համակարգված։

«Ուկրաինայի կողմից օգտագործվող ամեն ինչ զեկուցվել է Միացյալ Նահանգներին, և Ուկրաինան կարողացել է բարելավել իր արտադրած տեխնոլոգիաների բազմաթիվ տարրեր և առանձնահատկություններ՝ շնորհիվ մեր ինժեներների և տեղում գտնվող մարդկանց», - ասաց Ուկրաինայի առաջնորդը։

Զելենսկու խոսքով՝ ԱՄՆ-ն «վերջին տարիների ամենամեծ ցամաքային պատերազմի» միջոցով հավաքել է հուսալի և արժեքավոր տեղեկատվություն, որը թույլ է տվել Վաշինգտոնին ավելի լավ հասկանալ իր ապագա ներդրումային կարիքները։ «ԱՄՆ-ն չէր կարող ստանալ այս տեղեկատվությունը առանց իրական գործողությունների», - հավելեց Զելենսկին։

Զելենսկին նշել է, որ ԱՄՆ 105 միլիարդ դոլարի օգնության մի մասն օգտագործվել է նոր անօդաչու թռչող սարքերի (ԱԹՍ) մշակման համար, և որ այդ ջանքերը նպաստել են համատեղ ռազմատեխնիկական առաջընթացին։

«Դրա վրա են աշխատել գիտնականները, հետախուզությունը, ռազմական ինժեներները, դրա վրա է աշխատել ԱՄՆ-ն։ Երբ ԱՄՆ-ն վճարել է այս մշակումների համար, այն ստացել է անօդաչու թռչող սարքերի մասին լիարժեք և բաց տեղեկատվություն։ Սա նոր զենք է, որը ԱՄՆ-ն նախկինում չուներ... Հիմա ԱՄՆ-ն ունի այս ամբողջ փորձը», - հավելել է Ուկրաինայի նախագահը։