სენატორმა მარკიმ, წარმომადგენელმა პრესლიმ და საკანონმდებლო ორგანოს სხვა წევრებმა რუმეისა ოზთურქის აშშ-ის საიმიგრაციო და საბაჟო აღსრულების სამსახურის (ICE) მიერ დაპატიმრების გამო ტრამპის ადმინისტრაცია დაგმეს.

აშშ-ის სენატორმა ედ მარკიმ თურქეთის მოქალაქის და ფულბრაიტის სტიპენდიანტის, რუმეისა ოზთურქის საიმიგრაციო სამსახურების მიერ დაკავება დაგმო და ეს ფაქტი „ეროვნულ სირცხვილად“ და ტრამპის ადმინისტრაციის პირობებში განხორციელებული „ავტორიტარული“ რეპრესიების ნაწილად შეაფასა.

მარკიმ, წარმომადგენელთა პალატის წევრებთან, აიანა პრესლისთან და ჯიმ მაკგოვერნთან ერთად, ოთხშაბათს ლუიზიანაში ICE-ის დაკავების ცენტრების მონახულების შემდეგ ბოსტონის ლოგანის აეროპორტში ჟურნალისტებს ესაუბრა.

აშშ-ის საკანონმდებლო ორგანოს წევრები ლუიზიანაში ჩავიდნენ, რათა ICE-ის ზედამხედველობის ქვეშ მყოფ ოზთურქს და პალესტინური წარმოშობის ამერიკელ მაჰმუდ ხალილს შეხვედროდნენ.

„ოზთურქი ბრალის წაყენების გარეშეა დაკავებული“

ოზთურქი, რომელიც ტაფტსის უნივერსიტეტში ბავშვისა და ადამიანის განვითარების მიმართულებით სადოქტორო პროგრამაზე სწავლობს, 25 მარტს მასაჩუსეტსის შტატში, ქალაქ სომერვილში, საკუთარი ბინის წინ ნიღბიანმა ICE-ის აგენტებმა დააკავეს.

მარკის თქმით, ოზთურქისთვის არანაირი ბრალი არ წაუყენებიათ და ფედერალურმა ხელისუფლებამ ვერ წარმოადგინა ვერანაირი მტკიცებულება იმისა, რომ იგი საზოგადოებრივი უსაფრთხოებისთვის საფრთხეს წარმოადგენს.

მარკიმ თქვა: „მან გვითხრა, რომ ეშინია. მას მკაცრად მოექცნენ. ის, რასაც ტრამპის ადმინისტრაცია აკეთებს, არავითარ შემთხვევაში არ არის საიმიგრაციო პრაქტიკა, ეს ავტორიტარული მოპყრობაა. ისინი პოლიტპატიმრები არიან. ჩვენ ადამიანის უფლებების შემზარავი და სახიფათო დარღვევის წინაშე ვდგავართ.“

„ისინი უკანონო, საშინელ პირობებში ჰყავთ“

წარმომადგენელმა პრესლიმაც გამოთქვა შეშფოთება, ოზთურქისა და ხალილის დაკავება „სასტიკად“ და „უსამართლოდ“ შეაფასა. პრესლიმ აღნიშნა, რომ ორივე მათგანი ლუიზიანაში ICE-ის მიერ მართულ დაწესებულებებში „უკანონო, საშინელ პირობებში“ ჰყავთ.

პრესლიმ დასძინა, რომ ოზთურქი, მიუხედავად იმისა, რომ ნასამართლეობა არ აქვს, სამიზნე გახდა. წარმომადგენლის თქმით, ხალილი, რომელიც კოლუმბიის უნივერსიტეტში პროტესტში მონაწილეობისთვის დააკავეს, აშშ-ში ბინადრობის ნებართვის მქონე პრო-პალესტინელი აქტივისტია. მისთვის არანაირი ბრალი არ წაუყენებიათ და მისი მოთხოვნა პირველი შვილის დაბადებაზე დასასწრებად დროებით გათავისუფლების შესახებ უარყვეს.

პრესლიმ თქვა: „ის მხოლოდ გამოხატვის თავისუფლების უფლებას იყენებდა. ეს სამართალი არ არის. ეს პოლიტიკური პოზიციის გამო დასჯაა.“

ტრამპის ადმინისტრაცია კანონის იშვიათ მუხლს იყენებს

ტრამპის ადმინისტრაცია ამ პროცესში იყენებს საიმიგრაციო კანონის მუხლს, რომელიც პირთა დეპორტაციის საშუალებას იძლევა, მაგრამ იშვიათად გამოიყენება. უფლებადამცველები და იურიდიული ექსპერტები მკაცრად აკრიტიკებენ ამ მუხლის მშვიდობიანი პროტესტისა და გამოხატვის თავისუფლების შემთხვევებში გამოყენებას.

ოზთურქიც და ხალილიც სასამართლოში ებრძვიან დაკავების გადაწყვეტილებებს. ოზთურქის იურიდიული გუნდი ამტკიცებს, რომ თურქი სტუდენტის აკადემიური საქმიანობა და ნაწერები აშშ-ის კონსტიტუციის პირველი შესწორებით არის დაცული.

„ბრძოლას არ შევწყვეტთ“

წარმომადგენელმა მაკგოვერნმა აღნიშნა, რომ დაკავებები არღვევს როგორც აშშ-ის კონსტიტუციას, ისე საერთაშორისო ადამიანის უფლებებს და ეს გადაწყვეტილებები დაგმო.

მაკგოვერნმა თქვა: „ეს ქმედება ამორალური და არასწორია. ტრამპის ადმინისტრაცია სტუდენტებისა და აქტივისტების დაპატიმრებით ოპოზიციის გაჩუმებას ცდილობს. ჩვენ ბრძოლას არ შევწყვეტთ, სანამ ეს ადამიანები არ გათავისუფლდებიან.“

აშშ-ის საკანონმდებლო ორგანოს წევრებმა ასევე პირობა დადეს, რომ გააგრძელებენ ადმინისტრაციაზე ზეწოლას და ამ საქმეებს საზოგადოებისა და კონგრესის ყურადღების ცენტრში მოაქცევენ.