აშშ-ის პრეზიდენტის ბრძანება ითვალისწინებს ფედერალური საიმიგრაციო კანონების აღსრულების ხელის შემშლელი ადგილობრივი მმართველობების 30 დღის ვადაში გამოვლენას; ეს ადმინისტრაციული ერთეულები შესაძლოა ფინანსური დახმარების შეწყვეტის რისკის წინაშე აღმოჩნდნენ.

აშშ-ის პრეზიდენტმა დონალდ ტრამპმა, თანამდებობაზე დაბრუნების პირველი 100 დღის მოახლოებასთან ერთად, მკაცრი საიმიგრაციო პოლიტიკისთვის წინააღმდეგობის გამწევ „თავშესაფარ ქალაქებთან“ მიმართებით მკაცრი ზომების მისაღებად საპრეზიდენტო ბრძანებულებას მოაწერა ხელი.

ორშაბათს ხელმოწერილი ბრძანებულება ითვალისწინებს იმ შტატებისა და ადგილობრივი მმართველობების სიის 30 დღეში გამოქვეყნებას, რომლებიც ხელს უშლიან ფედერალური საიმიგრაციო კანონების აღსრულებას. აღნიშნულია, რომ ამ სიაში მოხვედრილებს გარკვეულ სახელმწიფო ფონდებზე წვდომის დაკარგვის რისკი ემუქრებათ.

ტრამპი ამ კვირაში ისაუბრებს თეთრ სახლში დაბრუნების შემდეგ მიღწეულ წარმატებებზე; ხაზს გაუსვამს ეკონომიკის, საგარეო პოლიტიკის, მთავრობის ეფექტიანობისა და იმიგრაციის სფეროებში მიღწეულ წარმატებებს.

რესპუბლიკელი ლიდერი აცხადებს, რომ მნიშვნელოვან პროგრესს მიაღწია მექსიკის საზღვარზე არალეგალური გადაკვეთების შემცირებაში, რაც მისი ერთ-ერთი წინასაარჩევნო დაპირება იყო. ეს გადაკვეთები მისი დემოკრატი წინამორბედის, ჯო ბაიდენის, მმართველობის პერიოდში რეკორდულ ნიშნულს აღწევდა.

თუმცა, ტრამპის პოპულარობა იანვრიდან მოყოლებული ეცემა. Washington Post-ABC-ის საზოგადოებრივი აზრის გამოკითხვის თანახმად, ამერიკელების 40%-ზე მეტმა ტრამპის მიმართ „კატეგორიულად უარყოფითი“ დამოკიდებულება გამოხატა.

ტრამპის პრესსპიკერმა, კეროლაინ ლევიტმა, ორშაბათს განაცხადა, რომ მექსიკის საზღვარზე არალეგალ იმიგრანტებთან შეხვედრების მაჩვენებელი 95%-ით შემცირდა იმ 12 თვესთან შედარებით, რომელიც 2024 წლის მარტში დასრულდა (როდესაც ბაიდენი ჯერ კიდევ თანამდებობაზე იყო). ეს რიცხვი, რომელიც ბაიდენის პერიოდში 140 ათასს შეადგენდა, 7 ათასამდე დაეცა.

ლევიტმა თქვა: „ამერიკის საზღვრები ახლა პრეზიდენტ ტრამპის წყალობით უსაფრთხოდაა. მან აღადგინა კანონის უზენაესობა, აამოქმედა ჩვენი საიმიგრაციო კანონები და დაიცვა ამერიკის სუვერენიტეტი.“

ტრამპის მკაცრმა რიტორიკამ წინასაარჩევნო კამპანიის დროს იმ პირების მიმართ, რომლებიც, მისი მტკიცებით, არალეგალ იმიგრანტებს შორის მოძალადეები და მკვლელები იყვნენ, გამოძახილი ჰპოვა არალეგალური იმიგრაციის გამო შეშფოთებულ ამერიკელ ამომრჩევლებში.

მოსამართლეებთან დაპირისპირება

ორშაბათს ხელმოწერილი საპრეზიდენტო ბრძანებულება მიზნად ისახავს „თავშესაფარ ქალაქებს“, რომლებიც, როგორც წესი, ადგილობრივ ხელისუფლებას უკრძალავენ ფედერალური აგენტებისთვის ინფორმაციის მიწოდებას დეპორტაციის რისკის ქვეშ მყოფი არალეგალი იმიგრანტების შესახებ.

ოთხი ქალაქის - ბოსტონის, ჩიკაგოს, დენვერისა და ნიუ-იორკის მერები მარტში კონგრესში გამართულ დაძაბულ მოსმენაზე საიმიგრაციო პოლიტიკის გამო დაკითხეს.

სასამართლოებმა დაადასტურეს თავშესაფრის კანონების კანონიერება და გასულ კვირას აშშ-ის მოსამართლემ დაადგინა, რომ ტრამპის ადმინისტრაციას არ შეუძლია შეუწყვიტოს ფედერალური დაფინანსება იმ ხელისუფლებებს, რომლებიც არალეგალ იმიგრანტებს შეზღუდულ დაცვას უზრუნველყოფენ.

იმის ნიშნად, თუ რაოდენ დიდ მნიშვნელობას ანიჭებს ტრამპი იმიგრაციის საკითხს, ორშაბათს თეთრი სახლის ეზოში იმიგრანტების პოლიციის მიერ გადაღებული ფოტოებით ბანერები გამოფინეს.

თითოეული ფოტოს ზემოთ დიდი ასოებით ეწერა „დაკავებულია“, ხოლო ქვემოთ - დანაშაულები, რომლებშიც მათ ბრალი ედებოდათ: „პირველი ხარისხის მკვლელობიდან“ დაწყებული, „ბავშვთა სექსუალური ძალადობით“ და „ფენტანილის გავრცელებით“ დამთავრებული.

თეთრი სახლის პრესრელიზში წარმოდგენილი იყო 100 ადამიანის სია, რომლებიც დახასიათებულნი იყვნენ როგორც „ყველაზე საშიში კრიმინალი არალეგალი იმიგრანტები“, რომლებიც ტრამპის თანამდებობაზე მოსვლის შემდეგ დააკავეს.

ამასობაში, წარმომადგენელთა პალატის რესპუბლიკელებმა წარმოადგინეს კანონპროექტი, რომელიც ტრამპს მთელი რიგი მაღალი საიმიგრაციო მოსაკრებლების დაწესების უფლებას აძლევს. ეს პროექტი თავშესაფრის მოთხოვნის განაცხადებისთვის მინიმუმ 1000 დოლარის მოსაკრებელს ითვალისწინებს.

ტრამპმა ასევე გაგზავნა ჯარისკაცები მექსიკის საზღვარზე და ტერორისტულ ორგანიზაციებად განსაზღვრა ლათინური ამერიკის ბანდები, როგორიცაა Tren de Aragua და MS-13.

თუმცა, ტრამპი დაუპირისპირდა მოსამართლეებს, უფლებადამცველ ჯგუფებსა და დემოკრატებს, რომლებიც აცხადებდნენ, რომ იგი არაკონსტიტუციურად მოქმედებდა, როდესაც იმიგრანტებს ზოგჯერ სასამართლო განხილვის უფლების გარეშე, დაჩქარებული წესით აძევებდა ქვეყნიდან.

ტრამპის ადმინისტრაციის საზღვრის უსაფრთხოებაზე პასუხისმგებელმა პირმა, ტომ ჰომანმა, ორშაბათს ჟურნალისტებს განუცხადა: „ჩვენ გვაქვს ყველაზე უსაფრთხო საზღვარი ამ ქვეყნის ისტორიაში“.

მას ჰკითხეს დეპორტაციის მაჩვენებლების შესახებ, რომლებიც ბაიდენის მაჩვენებლებს ჩამორჩებოდა, მიუხედავად ტრამპის დაპირებისა აშშ-ის ისტორიაში ყველაზე მასშტაბური მასობრივი დეპორტაციის კამპანიის ჩატარების შესახებ.

მიუხედავად იმისა, რომ მთავრობა დეტალურ მონაცემებს არ აქვეყნებს, იმიგრაციული პოლიტიკის ინსტიტუტმა განაცხადა, რომ წელს ნახევარი მილიონი ადამიანის დეპორტაციაა მოსალოდნელი, რაც ნაკლებია ბაიდენის პერიოდის 2024 ფისკალურ წელს დაფიქსირებულ 685 ათას დეპორტაციაზე.

ჰომანმა განაცხადა, რომ ეს შედარებები შეცდომაში შემყვანია, რადგან ბაიდენის დეპორტაციის მაჩვენებლები მოიცავდა საზღვარზე უკან დაბრუნებულ პირებსაც, ხოლო ამ ადამიანების უმეტესობას ახლა საზღვრის გადაკვეთამდე აჩერებენ.