100 күндік қызметін Мичигандағы митингте атап өткен АҚШ Президенті өндірісті қайта жандандыруға уәде беріп, құжатсыз мигранттарды сынға алды және автокөлік жұмыс орындарының қайта ашылуын мақтады. Қолдаушыларына: «Ондаған компания келеді», - деді.
АҚШ президенті Дональд Трамп Мичиган штатында қызметтегі алғашқы 100 күнін атап өтуге арналған екі шара ұйымдастырды. Бұл іс-шара арқылы ол америкалықтарға елдің бағыты туралы сенім ұялатуды көздеді.
Трамп сейсенбі күні Детройттың солтүстігіндегі Макомб қауымдастық колледжіндегі митингте «Не болып жатқанын қараңыздар, ондаған компания келуде. Сіздер не болып жатқанын көрулеріңіз керек. Барлығы Мичиганға қайта оралып, көлік жасауды қалайды», – деді.
«Біз бүгінгі кеште еліміздің жүрегінде, тарихтағы ең табысты алғашқы 100 күнді атап өту үшін жиналдық және көптеген адамның пікірі де солай», – деді Трамп.
«Барлығы мұны тарихтағы кез келген президенттің ең жақсы 100 күндік бастамасы деп қолдауда», - деді АҚШ көшбасшысы.
Ұлттық гвардия базасында сөйлеген сөзінде Трамп өзінің әкімшілігінің қорғанысқа салған инвестицияларын атап өтіп, 2017-2021 жылдардағы алғашқы әкімшілігінің сыртқы саясаттағы жетістіктерін мақтады.
Ұлттық қорғанысқа 1 триллион доллар инвестиция
Президент Мичиган губернаторы, демократ Гретхен Уитмерді мақтады. Ол Уитмердің Детройттың солтүстік-шығысындағы Селфридж ұлттық гвардия базасын құтқаруда маңызды рөл атқарғанын, өткен жылы жергілікті БАҚ базаның болашағына алаңдаушылық білдіргенін айтты.
Трамп ондаған сарбаздың, сондай-ақ Уитмер мен Хегсетің алдында сөйлеген сөзінде «Мен ұлттық қорғанысқа рекордтық 1 триллион доллар инвестицияны қолдаймын», – деді.
Өз сөзінде ол Селфридж базасына 21 «Boeing F-15X» ұшағы жеткізілетінін айтты. Уитмер бұл шешім базаның миссиясын қамтамасыз етіп, Мичиган үшін үлкен, екіжақты жеңіс болғанын және жұмыс орындарын сақтап қалатынын мәлімдеді.
Кешкісін Трамп Детройт маңындағы Уоррен қаласында өткен митингте сөз сөйледі. 20 қаңтарда қызметке кіріскеннен бері ең үлкен іс-шара болған бұл митинг оның әкімшілігінің алғашқы айларындағы негізгі жетістіктерін атап өтуге мүмкіндік берді.
«Reuters/Ipsos» агенттігінің жексенбі күні аяқталған үш күндік сауалнамасы бойынша респонденттердің 42%-ы Трамптың осы уақытқа дейінгі қызметін мақұлдаған, ал 53%-ы мақұлдамаған. Бұл қаңтардағы «Reuters/Ipsos» сауалнамасындағы 47% мақұлдаудан төмен.
Сауалнамада Трамптың экономикалық басқаруына респонденттердің тек 36%-ы қолдау білдірген, бұл оның қазіргі мерзіміндегі немесе 2017-2021 жылдардағы президенттігі кезіндегі ең төменгі деңгей.
