Norwegiýa, Ysraýylyň Gazada genosid söweşini dowam etdirýän günlerinde Palestin döwleti bilen resmi gatnaşyk edýändigini penşenbe güni açyk aýdyň ýagdaýda görkezdi.

Palestinanyň Norwegiýadaky Adatdan daşary we Doly ygtyýarly ilçisi hökmünde bellenen Mari Sedn ynanç hatyny Norwegiýanyň Şasy Haralda gowşurdy.

Norwegiýanyň Palestinany resmi taýdan ykrar etmegi, Osloda diplomatik wekilhananyň açylmagy iki ýurduň arasyndaky hoşniýetli gatnaşyklar taýdan diýseň möhüm.

Norwegiýa bilen birlikde häzire çenli Ýewropaly 13 döwlet, Palestinany garaşsyz döwlet hökmünde resmi taýdan ykrar edipdi.

BMG-na agza 193 ýurtdan 148-i Palestinany resmi taýdan ykrar etdi.

Palestinanyň garaşsyzlyk hukugy

Norwegiýa, geçen ýylyň 22-nji maýynda, Ysraýylyň Gaza guraýan hüjümlerini artdyrýan we on müňlerçe palestinalyny öldüren döwründe Palestinany garaşsyz döwlet hökmünde ykrar etmek barada karar kabul edipdi.

Norwegiýa, palestinalylaryň garaşsyzlyk we öz ykbalyny kesgitlemek hukugynyň bardygyny nygtaýar.

Oslo şol bir wagtda Ysraýyllylaryň we Palestinalylaryň öz döwletlerinde parahatçylykly ýagdaýda ýaşamak hukugyna we iki döwletli çözgüde goldaw berýär.

Ysraýylyň 2023-nji ýylyň oktýabr aýyndan bäri Gazada dowam etdirýän genosid söweşinde 51 müň 200-den gowrak palestinaly öldürildi, müňlerçe adam ýaralandy.

Ysraýylyň genosid söweşi sebäpli Halkara Adalat diwanynda iş gozgaldy.

Halkara jenaýat kazyýeti, geçen ýylyň noýabr aýynda Ysraýylyň Premýer-ministri Binýamin Netanýahu bilen ozalky Goranmak ministri Ýoaw Gallandyň Gazada eden harby jenaýatlary we adamzada garşy eden jenaýatlary sebäpli tussag edilmegi barada karar kabul edipdi.

Norwegiýa, Netanýahuny we Gallandy ýurda gelen halatynda olary tussag etjekdiklerini mälim eden Ýewropaly ilkinji ýurt boldy.