زېلېنىسكىي، كىيېۋنىڭ ۋاشىنگتون بىلەن «ئورتاق چۈشەنچە»گە ئىگە بولۇشقا تىرىشىۋاتقانلىقىنى ۋە ئۇكرائىنانىڭ ئۇرۇشتا ئىشلىتىلگەن ئامېرىكا قوراللىرىغا دائىر مەلۇماتلارنى ھەمبەھرىلەش ھەمدە ئۇچقۇچىسىز ھاۋا ئاپپاراتى تېخنولوگىيەسىنى بىرلىكتە تەرەققىي قىلدۇرۇش مەسىلىسىدىكى ئوچۇق-ئاشكارىلىقىنى تەكىتلىدى.

ئۇكرائىنا پىرېزىدېنتى ۋولودىمىر زېلېنىسكىي، ئۆز دۆلىتىنىڭ ئامېرىكا قوشما ئىشتاتلىرى بىلەن، رۇسىيەنىڭ ئۇرۇشتىكى «تاجاۋۇزچى» تەرەپ ئىكەنلىكى توغرىسىدا ئورتاق چۈشەنچە ھاسىل قىلىشنى خالايدىغانلىقىنى بىلدۈردى ۋە كىيېۋنىڭ ۋاشىنگتوننى مۇھىم بىر ئىستراتېگىيەلىك ھەمراھ دەپ قارايدىغانلىقىنى ئەسكەرتتى.

زېلېنىسكىي ئامېرىكالىق مۇخبىر بېن شاپىرو بىلەن ئۆتكۈزگەن ۋە ئىنتېرفاكس ۋە ئۇكرائىنا خەۋەر ئاگېنتلىقى نەقىل قىلىپ تارقاتقان سۆھبەت خاتىرىسىدە، «ئامېرىكا قوشما ئىشتاتلىرىنىڭ بۇ توقۇنۇشتا ۋاسىتىچى ئورنىدا ئىكەنلىكىنى بىلىمىز. بۇ ئامېرىكا قوشما ئىشتاتلىرىنىڭ تاللىشى» دېدى.

زېلېنىسكىي، «لېكىن بىز ئامېرىكا قوشما ئىشتاتلىرىنى تەسىر كۈچى بار ئىستراتېگىيەلىك بىر ھەمراھ دەپ قارايمىز» دېگەنلەرنى سۆزلىرىگە ئىلاۋە قىلدى.

ئۇكرائىنا پىرېزىدېنتى يەنە «بىز بۇ ئىككى كۈچ رۇسىيەگە قارشى ئىشلىتىلىشى كېرەك دەپ ئويلايمىز، چۈنكى تاجاۋۇزچى بىز ئەمەس رۇسىيەدۇر. رۇسىيەنىڭ تاجاۋۇزچى ئىكەنلىكى توغرىسىدا ئورتاق بىر چۈشەنچىگە ئىگە بولۇشنى بەكلا ئارزۇ قىلىمىز» دېدى.

زېلېنىسكىي، ئامېرىكا پىرېزىدېنتى دونالد ترامپنىڭ ئوخشىمىغان بىر ھەل قىلىش يولى ئىزدەۋاتقانلىقىنى قوبۇل قىلىدىغانلىقىنى بىلدۈرۈپ: «پىرېزىدېنت ترامپنىڭ نېمىنى خالاۋاتقانلىقىنى چۈشىنىمەن. ئۇنىڭ مۇمكىن بولغان بىر ھەل قىلىش چارىسى يولىدىكى ئىزدىنىشلىرىگە ھۆرمەت قىلىمەن. بۇ ئۇنىڭ ئۇسلۇبى» دېدى ۋە بۇنىڭ بىلەن بىرگە ئۇكرائىنانىڭ بۇ مەسىلىدە ۋاشىنگتوننىڭ «تەڭپۇڭلۇقنى ساقلاشقا ئۇرۇنۇشى»ىنى خالىمايدىغانلىقىنى قەيت قىلدى.

زېلېنىسكىي يەنە، ئۇكرائىنانىڭ ئامېرىكا قورال سىستېمىلىرىنى ئىشلىتىش ۋە تەرەققىي قىلدۇرۇش مەسىلىسىدە ئوچۇق-ئاشكارا ئىكەنلىكىنى؛ ئۇكرائىنالىق مۇتەخەسسىسلەرنىڭ ئامېرىكالىق ھەمراھلىرى بىلەن ماسلىشىپ نۇرغۇن تېخنولوگىيەلەرنى تەرەققىي قىلدۇرغانلىقىنى تەكىتلىدى.

ئۇكرائىنا رەھبىرى يەنە: «ئۇكرائىنانىڭ ئىشلەتكەن ھەممە نەرسىسى ئامېرىكا قوشما ئىشتاتلىرىغا مەلۇم قىلىندى ۋە ئۇكرائىنا، ئىنژېنېرلىرىمىز ۋە نەق مەيداندىكى كىشىلىرىمىز سايىسىدا ئىشلەپچىقارغان تېخنولوگىيەلەرنىڭ نۇرغۇن ئېلېمېنتلىرى ۋە ئالاھىدىلىكلىرىنى تەرەققىي قىلدۇرالىدى» دېدى.

زېلېنىسكىينىڭ قارىشىچە، ئامېرىكا قوشما ئىشتاتلىرى، «يېقىنقى يىللاردىكى ئەڭ چوڭ قۇرۇقلۇق ئۇرۇشى» سايىسىدا ئىشەنچلىك ۋە قىممەتلىك مەلۇماتلارنى توپلىغان ۋە بۇ ۋاشىنگتوننىڭ كەلگۈسىدىكى مەبلەغ ئېھتىياجلىرىنى تېخىمۇ ياخشى چۈشىنىشىگە كاپالەتلىك قىلغان. زېلېنىسكىي، «ئامېرىكا قوشما ئىشتاتلىرى بۇ مەلۇماتنى ھەقىقىي ھەرىكەتلەر بولماي تۇرۇپ ئالالمايتتى» دېگەنلەرنى سۆزلىرىگە ئىلاۋە قىلدى.

زېلېنىسكىي، ئامېرىكا قوشما ئىشتاتلىرى تەمىنلىگەن 105 مىليارد دوللارلىق ياردەمنىڭ بىر قىسمىنىڭ يېڭى ئۇچقۇچىسىز ھاۋا ئاپپاراتلىرىنى تەرەققىي قىلدۇرۇش ئۈچۈن ئىشلىتىلگەنلىكىنى ۋە بۇ تىرىشچانلىقلارنىڭ ئورتاق ھەربىي-تېخنىكىلىق ئىلگىرلەشلەرگە ھەسسە قوشقانلىقىنى بىلدۈردى.

ئۇكرائىنا پىرېزىدېنتى يەنە مۇنداق دېدى: «ئالىملار، ئىستىخبارات، ھەربىي ئىنژېنېرلار ئۈستىدە تەتقىقات ئېلىپ بېرىۋاتقان نەرسە مۇشۇ ئىدى، ئامېرىكا قوشما ئىشتاتلىرى ئۈستىدە ئىشلەۋاتقان نەرسىمۇ مۇشۇ ئىدى. ئامېرىكا قوشما ئىشتاتلىرى بۇ تەرەققىياتلار ئۈچۈن پۇل تۆلەش ئارقىلىق ئۇچقۇلار ھەققىدە تولۇق ۋە ئوچۇق مەلۇمات ئالدى. بۇ، ئامېرىكا قوشما ئىشتاتلىرىنىڭ ئىلگىرى ئىگە بولمىغان يېڭى بىر قورالى ئىدى... ھازىر ئامېرىكا قوشما ئىشتاتلىرى پۈتۈن بۇ تەجرىبىگە ئېرىشتى.»