Shimoliy-sharqiy Xitoyda joylashgan bir restoranda yuz bergan yong‘in 22 kishining hayotiga zomin bo‘ldi va uch kishi jarohatlandi, deb xabar berdi Pekinning davlat telekanali. Yong‘in poytaxt Pekindan taxminan 580 kilometr (360 mil) uzoqlikda joylashgan Liaoyang shahrida sodir bo‘lgan.

“29-aprel kuni soat 12:25 da (0425 GMT) restoranda yong‘in chiqdi,” deb xabar berdi CCTV. “Soat 14:00 ga kelib, hodisa 22 kishining o‘limiga va uch kishining jarohatlanishiga olib keldi,” deb qo‘shimcha qildi. Prezident Si Szinpin bu yong‘in “katta talafotlar” keltirib chiqarganini va undan olinadigan saboqlar “juda jiddiy” ekanini ta’kidladi, deb xabar berdi CCTV.

Si Szinpin “jarohatlanganlarni davolash uchun barcha choralarni ko‘rish, halok bo‘lganlarning oilalariga yordam ko‘rsatish, yong‘in sabablarini tezkorlik bilan aniqlash va qonun doirasida javobgarlikni ta’minlash”ni talab qildi, deyiladi xabarda.

Internetda tarqalgan va AFP tomonidan tasdiqlangan videolarda ikki qavatli restoranni qamrab olgan kuchli alangalar va osmon tomon ko‘tarilgan qalin qora tutun ko‘rinadi. Douyin (TikTok’ning Xitoydagi versiyasi) platformasida e’lon qilingan boshqa tasdiqlangan videolarda esa, shifokorlar bir jabrlanuvchini nosilkada tez yordam mashinasiga olib kirayotgani va bir nechta o‘t o‘chiruvchilar shlanglar yordamida alangalarni o‘chirishga urinayotgani aks etgan.

Xitoyda xavfsizlik qoidalariga rioya qilmaslik va qurilish me’yorlarining sustligi sababli halokatli yong‘inlar nisbatan tez-tez sodir bo‘ladi. Shu oyda Xitoyning Xebey provinsiyasidagi qariyalar uyida yuz bergan yong‘inda 20 kishi halok bo‘ldi. Yanvar oyida esa, Pekinning shimoli-g‘arbida joylashgan Chjanzyakou shahridagi sabzavot bozorida yong‘in chiqib, 8 kishi halok bo‘lgan va 15 kishi jarohatlangan edi.

Bundan bir oy oldin, Xitoyning sharqidagi Rongcheng shahrida qurilish maydonida yuz bergan yong‘inda 9 kishi hayotdan ko‘z yumgan edi.