Burkina Faso ayaa fiidnimadii dambe ee Isniintii si rasmi ah u xaqiijisay isku daygii weerarka ee madaxtooyada.
Dalka Galbeedka Afrika ku yaal waxaa tan iyo Sebtembar 2022 maamulaya hoggaamiyeyaal militari ka dib afgambi uu hoggaaminayay Kabtan Ibrahim Traore, kaasoo inta badan ku eedeeyay Côte d'Ivoire inay inay hoy u tahay mucaaradkiisa.
Wasiirka Amniga ee Burkina Faso Mahamadou Sana ayaa bayaan uu telefishanka ka jeediyay ku sheegay in hay'adaha sirdoonka ee dalka Galbeedka Afrika ay qabteen isgaarsiin dhexmartay sarkaal ka tirsan Ciidamada Qalabka Sida ee Burkina Faso oo shaacinayay goobaha ciidamada Burkinabe iyo taageerayaashooda.
“Xog xasaasi ah ayaa loo gudbiyay argagixisada iyadoo ujeeddadu ahayd in la xoojiyo weerarrada ka dhanka ah ciidamada dagaalamaya iyo dadka rayidka ah, iyadoo la doonayo in kacdoon laga kiciyo mas'uuliyiinta,' ayuu yiri Sana."
Wasiirku wuxuu sheegay in “qorshihii weynaa” uu ku dhammaaday qorshe weerar oo lagu beegsanayay madaxtooyada Burkina Faso kaasoo ay fulin lahaayeen koox askar ah oo ay soo qorteen "cadowga qaranka" Abriil 16.
'Abuurista fowdo'
Sana ayaa tilmaamay in "maskaxdii ka dambaysay" shirqoolka ay joogeen meel ka baxsan dalka ayna ka hawlgalayeen Côte d'Ivoire. “'Shirqoolku si firfircoon ayuu uga socdaa xaruntooda hawlgallada ee Abidjan, iyadoo ujeedadu tahay in fowdo laga abuuro Burkina Faso ka hor Juun,' ayuu raaciyay."
Toddobaadkii hore, dhowr sarkaal oo ciidanka ah ayaa la xiray lagana qaaday xilalkoodii, taasoo dhalisay warar xan ah oo ku saabsan isku day afgambi militari.
Dib u qeexidda isbahaysiga
Dowladaha militarigu hoggaamiyo ee Burkina Faso, Mali iyo Niger ayaa aasaasay Isbahaysiga Dalalka Saaxil (AES) bishii Sebtembar 2023 iyagoo heshiis ku gaaray inay xoojiyaan xiriirka siyaasadeed, dhaqaale iyo amni ee ka dhexeeya saddexda dal ee Galbeedka Afrika.
Isbahaysigani wuxuu qaaday tallaabooyin geesinimo leh oo dib loogu qeexo isbahaysigiisa caalamiga ah, oo ay ku jiraan ka bixitaannadii dhowaa ee Ururka Dhaqaalaha ee Dalalka Galbeedka Afrika (ECOWAS) iyo Ururka Caalamiga ah ee La Francophonie (OIF).
