Madaxweynaha Namibia, Netumbo Nandi-Ndaitwah, ayaa xilkii ka qaadday Wasiirkii Beeraha, Kalluumaysiga, Biyaha iyo Dib-u-habaynta Dhulka oo la xiray, Mac-Albert Hengari.
"Iyadoo la cuskanayo awoodaha uu Madaxweynaha siinayo Qodobka 32(6) ee Dastuurka Jamhuuriyadda Namibia, Madaxweyne Netumbo Nandi-Ndaitwah waxay xilkii ka qaadday Mudane Dr. Mac-Albert Hengari oo ahaa Wasiirka Beeraha, Kalluumeysiga, Biyaha iyo Dib-u-habeynta Dhulka," ayaa lagu yiri qoraal kasoo baxay Madaxtooyada dalkaas Koonfur Afrika ee lagu baahiyay barta X (Twitter) maalintii Axadda.
Xil ka qaadista Hengari waxay dhaqan galeysaa laga bilaabo Abriil 23, xilligaas oo "ay ahayd inuu is casilo," sida lagu sheegay qoraalka, iyadoo intaas lagu daray in sidoo kale laga saaray baarlamaanka.
Hengari, oo la magacaabay bishii Maarso, ayaa la xiray Sabtidii, waxaana lagu soo oogay baaritaanno la xiriira eedeymo badan, oo ay ku jiraan kufsi, tacaddi ku saleysan jinsiga, iyo afduub, sida ay sheegtay idaacadda maxalliga ah ee NBC.
