In ka badan 100 maxbuus ayaa ka baxsaday xabsi ku yaal Chad, intii uu socday israsaasayn ay ku dhinteen saddex qof, kuna dhaawacmay guddoomiye gobol oo booqanayay xarunta.

Baxsashadu ayaa dhacday fiidnimadii Jimcaha, markii kacdoon uu ka dhacay xabsiga amniga sare leh oo shan kiiloomitir (saddex mayl) u jira magaalada Mongo, oo ku taalla bartamaha dalka.

“Halkaa waxaa ka baxay ku dhawaad 100 maxbuus,saddex qof ayaa dhintay, saddexna waa dhaawacmeen,” ayuu yiri Hassan Souleymane Adam, xoghayaha guud ee gobolka Guera, oo ay ku taallo Mongo.

Sarkaal maxalli ah oo ku sugan Mongo, oo la hadlay AFP isagoo codsaday in aan magaciisa la shaacin, ayaa sheegay in maxaabiistu ay jabiyeen xafiiska maamulaha si ay hub uga xadaan.

Cunto La’aan

“Israsaasayn ayaa dhexmartay ilaalada, isla markaasna waxaa yimid guddoomiyihii. Waa la dhaawacay,” ayuu intaa ku daray sarkaalku.

Sarkaalka ayaa xaqiijiyay in ay jireen saddex dhimasho ah, wuxuuna tirada guud ee maxaabiista baxsatay ku sheegay 132.

Wuxuu sheegay in maxaabiistu ay kacdoon sameeyeen ka dib markii ay ka cawdeen cunto la’aan.

Wasiirka Caddaaladda ee Chad, Youssouf Tom, ayaa Wargeyska AFP taleefoonka ugu sheegay inuu diyaar u yahay inuu u duulo gobolka, isla markaana uu bixin doono “macluumaad sax ah marka uu Mongo gaaro saacadaha soo socda.”