Presidenti i Türkiyes Recep Tayyip Erdoğan tha se mund ta vizitojë ShBA-në dhe shpreson të zhvillojë një takim ballë për ballë me presidentin amerikan Donald Trump.
Duke folur me gazetarët gjatë fluturimit të kthimit nga Hungaria të enjten, pas një samiti joformal të Organizatës së Shteteve Turke në Budapest, Erdoğan foli mbi një sërë çështjesh të politikës së jashtme, përfshirë Sirinë dhe luftën në Gaza.
"Ndoshta mund të udhëtoj për në ShBA. Mendoj se do të kemi shans për t'u takuar ballë për ballë me z. Trumpin", tha presidenti turk.
Erdoğan përshëndeti vendimet e fundit ndërkombëtare për të hequr sanksionet ndaj Sirisë, duke e quajtur këtë zhvillim "një hap vendimtar drejt stabilitetit" në vendin e shkatërruar nga lufta dhe duke thënë se kjo pasqyron suksesin e "diplomacisë konstruktive" të Türkiye.
Lidhur me integrimin e YPG-së, degës siriane të grupit terrorist PKK, në kuadrin e ri sirian, ai tha se Türkiye po e monitoron nga afër situatën. "Është thelbësore që qeveria e Damaskut të mbetet e përqendruar në këtë", shtoi ai.
Ndërkohë, Departamenti i Shtetit i ShBA-së ka theksuar atë që e ka quajtur "epokë të re partneriteti" në marrëdhëniet Türkiye-ShBA pas një takimi të martën të Grupit të Punës Türkiye-ShBA për Sirinë në Uashington.
Në një deklaratë të përbashkët të lëshuar pas takimit të Grupit të Punës për Sirinë u tha se Türkiye dhe ShBA-ja janë të përkushtuara për ta rritur bashkëpunimin dhe koordinimin mbi stabilitetin dhe sigurinë në Siri, siç është përcaktuar nga Erdoğan dhe Trump.
Lidhur me luftën në Gaza, Erdoğan tha se Izraeli po izolohet gjithnjë e më shumë në skenën botërore për shkak të veprimeve të tij dhe vuri në dukje atë që ai e quajti një "zgjim në rritje" në Evropë kundër veprimeve izraelite – megjithëse vuri në dukje se një ndryshim i tillë ka ardhur vonë.
"Historia do t'i mbajë përgjegjës ata që dështuan në provimin e Gazës. Türkiye ka qëndruar fort në anën e njerëzisë dhe dinjitetit njerëzor dhe do të vazhdojë ta bëjë këtë", tha ai.
Ai e përshkroi krizën në Gaza si më shumë sesa një katastrofë humanitare, duke e quajtur atë "një provë të sinqeritetit të sistemit ndërkombëtar" në të cilën institucionet perëndimore kanë dështuar.
