Kryeministri në detyrë i Kosovës, Albin Kurti, ka takuar mbrëmë në një darkë pune Përfaqësuesen e Lartë të Bashkimit Evropian për Punë të Jashtme dhe Politikë të Sigurisë, Kaja Kallas.
Siç njofton Zyra e Kryeministrit të Kosovës, Kurti i ka uruar mirëseardhje kryediplomates evropiane dhe e ka falënderuar për vizitën dhe mbështetjen e Bashkimit Evropian ndaj Kosovës.
Kurti dhe Kallas kanë diskutuar marrëdhëniet ndërmjet Kosovës dhe BE-së, agjendën e reformave evropiane dhe Planin e Rritjes.
Kryeministri Kurti ka theksuar se Kosova, krahas linjëzimit të politikës së jashtme me atë të BE-së, ka bërë progres të konsiderueshëm në reformat e brendshme, dhe se kjo theksohet dhe dëshmohet edhe në raportet e vendit të BE-së.
Ai e ka falënderuar përfaqësuesen Kallas për njoftimin se BE-ja ka nisur largimin gradual të masave kufizuese ndaj Kosovës dhe përpjekjet e saj në këtë drejtim, teksa ka shtuar se ato duhet të hiqen plotësisht dhe ka theksuar që Kosova duhet të marrë statusin kandidat si demokracia më e avancuar e Ballkanit Perëndimor.
Gjatë darkës së shtruar nga kryeministri, gjithashtu është diskutuar edhe për procesin paszgjedhor në vend dhe angazhimet për formimin e institucioneve të legjislaturës së nëntë.
Në lidhje me procesin e dialogut Prishtinë-Beograd të ndërmjetësuar nga BE-ja, Kurti ka theksuar rëndësinë e zbatimit të plotë të Marrëveshjes Bazike dhe Aneksit të saj.
Ndërkohë, ai ka rikujtuar se Serbia duhet të mbahet përgjegjëse për sulmin terrorist dhe paramilitar në Banjskë dhe se i akuzuari si kryeterrorist Millan Radoiçiq, për të cilin tashmë ka aktakuzë 160-faqëshe nga Prokuroria e Republikës së Kosovës, duhet t’i dorëzohet Kosovës.
Sipas njoftimit të Zyrës së Kryeministrit, Kurti gjithashtu ka ngritur çështjen e shkeljeve të vazhdueshme dhe të rënda të të drejtave të shqiptarëve në Preshevë, Medvegjë dhe Bujanoc nga Serbia dhe ka kërkuar që BE-ja të bëjë veprime konkrete për mbrojtjen e të drejtave të shqiptarëve të luginës.
Kallas nisi një turne Ballkanin Perëndimor dy ditë më parë, duke vizituar Serbinë dhe Kosovën, ndërsa sot ka mbërritur në Maqedoninë e Veriut.
