Të paktën 8.938 njerëz humbën jetën në rrugët e emigrantëve në vitin 2024, duke e bërë këtë vit më vdekjeprurësin deri më tani, sipas të dhënave të reja nga Organizata Ndërkombëtare për Migracionin (IOM), të publikuara të premten.
Ky numër tejkalon rekordin e mëparshëm prej 8.747 vdekjesh të regjistruara në vitin 2023, duke vazhduar një trend pesëvjeçar të rritjes së vdekjeve, tha agjencia.
"Tragjedia e rritjes së numrit të vdekjeve mes emigrantëve në mbarë botën, është edhe e papranueshme dhe e parandalueshme. Pas çdo numri qëndron një qenie njerëzore, humbja e të cilit është shkatërruese," tha Ugochi Daniels, Zëvendës Drejtor i Përgjithshëm i IOM-it.
"Rritja e numrit të vdekjeve në kaq shumë rajone të botës tregon pse ne kemi nevojë për një përgjigje ndërkombëtare, gjithëpërfshirëse që mund të parandalojë humbje të mëtejshme tragjike të jetës."
Të dhënat e IOM-it tregojnë se viti 2024 ishte viti më vdekjeprurës në disa rajone – 2.778 vdekje u regjistruan në Azi, 2.242 në Afrikë, 233 në Evropë, 2.452 në Detin Mesdhe, duke nënvizuar nevojën urgjente për sisteme adekuate kërkimi dhe shpëtimi, si dhe rrugë të sigurta dhe të rregullta emigrantësh si një alternativë ndaj këtij udhëtimi të rrezikshëm.
Të paktën 1.233 njerëz kanë humbur jetën në kontinentin amerikan, duke përfshirë një rekord 341 vdekjesh në Karaibe dhe 174 në Grykën Darién.
Sipas të dhënave, dhuna mbeti një shkak i rëndësishëm i vdekjeve midis emigrantëve, me rreth 600 jetë të humbura vetëm në Azinë Jugore dhe Juglindore. Megjithatë, numri aktual i vdekjeve ka të ngjarë të jetë më i lartë, pasi shumë mbeten të paregjistruar për shkak të mungesës së burimeve zyrtare.
"Rritja e numrit të vdekjeve është e tmerrshme në vetvete, por fakti që mijëra njerëz mbeten të paidentifikuar çdo vit e bën këtë tragjedi edhe më të madhe," tha Julia Black, koordinatore e projektit të IOM-it.
"Përveç dëshpërimit dhe pyetjeve të pazgjidhura me të cilat përballen familjet që kanë humbur të dashurit, mungesa e të dhënave më të plota për rreziqet me të cilat përballen emigrantët fsheh gjithashtu përgjigje që mund të shpëtojnë jetë."
