Grupi palestinez i rezistencës, Hamas, paralajmëroi të martën se plani izraelit për ta zgjeruar ofensivën në Gaza do të nënkuptonte “sakrifikimin” e pengjeve që ndodhen aty.

Të dielën, Kabineti i Sigurisë së Izraelit miratoi një plan për ta zgjeruar luftën e vazhdueshme në Gaza dhe për të okupuar territore brenda enklavës palestineze.

“Miratimi nga kabineti i okupimit (izraelit) për ta zgjeruar ofensivën tokësore në Gaza përbën një vendim të qartë për t'i sakrifikuar pengjet izraelite në enklavë”, thuhet në një deklaratë të Hamasit.

Grupi e cilësoi vendimin izraelit si “një ripërsëritje e ciklit të dështimit” gjatë 20 muajve të fundit, pa “arritur qëllimet e shpallura”.

Sipas Hamasit, komentet e kryeministrit izraelit Benjamin Netanjahu mbi zgjerimin e luftës në Gaza “pasqyrojnë këmbënguljen e tij për të kryer më shumë krime kundër civilëve, nën mbështetjen që i siguron administrata amerikane”.

Hamas u bëri thirrje kombeve arabe dhe islame, OKB-së dhe bashkësisë ndërkombëtare “të ndërmarrin veprime të menjëhershme për ta ndalur qeverinë fashiste të okupimit dhe për t'i çuar udhëheqësit e saj përpara drejtësisë ndërkombëtare”.

Sipas vlerësimeve izraelite, 59 pengje vazhdojnë të mbahen në Gaza, nga të cilët 24 besohet se janë gjallë. Në anën tjetër, mbi 9.500 palestinezë ndodhen në burgjet izraelite nën kushte të rënda, përfshirë raporte për tortura, uri dhe neglizhencë mjekësore, sipas organizatave për të drejtat e njeriut palestineze dhe izraelite.

Mbi 52.600 palestinezë janë vrarë në Gaza nga ofensiva brutale izraelite që prej tetorit 2023, shumica prej tyre gra dhe fëmijë.

Gjykata Ndërkombëtare Penale (GjNP) lëshoi në nëntor urdhërarreste për Netanjahun dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu po përballet me një padi për gjenocid në Gjykatën Ndërkombëtare të Drejtësisë për luftën në enklavë.