Mijëra njerëz protestuan në kryeqytetin e Belgjikës, Bruksel, kundër politikave të kursimit që do t’i ulnin shpenzimet sociale në vend.

Me thirrjen e sindikatave të ndryshme në vend, rreth 15.000 njerëz punonjës në sektorë jofitimprurës si shëndetësia, organizatat e shoqërisë civile, kultura dhe artet u mblodhën përpara Stacionit të Trenit Verior në Bruksel.

Duke brohoritur slogane antiqeveritare, protestuesit përdorën rrugët kryesore të qytetit dhe marshuan disa kilometra deri në sheshin "Albertine".

Trafiku u ndërpre në zonat qendrore të Brukselit për shkak të marshimit. Protestuesit mbajtën pankarta me mbishkrimet si "Sektori i kujdesit shëndetësor në rrezik", "Solidaritet për kulturën, shëndetësinë dhe arsimin" dhe "Koha për të mbështetur sektorët jofitimprurës".

Në Belgjikë ata që punojnë në sektorin jofitimprurës vuajnë nga mungesa e stafit dhe ngarkesa e madhe e punës. Protestuesit kërkojnë që qeveritë federale dhe rajonale në Belgjikë të ndajnë më shumë burime për fusha të tilla si shëndetësia, mbështetja sociale dhe kultura.

Qeveria e re në Belgjikë, si pjesë e politikës së saj të kursimit, planifikon të bëjë shkurtime serioze në shpenzime të ndryshme sociale.