Presidenti turk, Recep Tayyip Erdoğan, në një bisedë telefonike me kryetarin e Partisë së Veprimit Demokratik (SDA) të Bosnjë e Hercegovinës, Bakir Izetbegoviq, deklaroi se Türkiye po ndjek me shumë vëmendje dhe me përpikëri zhvillimet në BeH.

Sipas një deklarate nga Drejtoria e Komunikimeve të Presidencës së Türkiyes, në bisedën Erdoğan-Izetbegoviq u diskutua me të gjitha dimensionet për situatën e fundit në Bosnjë e Hercegovinë dhe zhvillimet rajonale.

Në bisedë, presidenti Erdoğan deklaroi se Türkiye po ndjek me shumë vëmendje dhe me kujdes zhvillimet në Bosnjë e Hercegovinë dhe tensioni në rritje duhet të marrë fund sa më shpejt që të jetë e mundur në kuadrin e sundimit të rendit kushtetues dhe të rendit ligjor në BeH.

Erdoğan deklaroi se Türkiye do të vazhdojë të ofrojë mbështetje të fortë për të mbrojtur integritetin territorial, sovranitetin dhe rendin kushtetues të BeH-së dhe se në këtë kuadër presidentit të entitetit Republika Sërpska të Bosnjë dhe Hercegovinës, Millorad Dodik, i janë bërë paralajmërimet e nevojshme.

Presidenti Erdoğan theksoi se zhvillimet në Bosnjë e Hercegovinë nuk janë shkaktuar nga një konflikt midis popujve themelues, se është e rëndësishme që partitë politike që mbështesin integritetin territorial brenda BeH-së të bashkohen në një bazë minimale të përbashkët dhe se komuniteti ndërkombëtar duhet gjithashtu të mbajë një qëndrim të fortë kundër separatizmit në rajon.