TRT World është vlerësuar këtë vit me katër çmime prestigjioze në edicionin e 2025 të New York Festivals® TV & Film Awards.
Në këtë garë, që renditet mes më të respektuarave në botën e mediave, TRT World konfirmoi edhe një herë suksesin e saj në fusha të ndryshme, nga gazetaria hulumtuese te marrëdhëniet ndërkombëtare, nga ngjarjet aktuale deri te promocionet televizive.
Kulla e Artë në kategorinë e Gazetarisë Hulumtuese iu dha dokumentarit ”Holy Redemption”. I njëjti produksion fitoi edhe Kullën e Argjendtë në kategorinë e Marrëdhënieve Ndërkombëtare.
Në këtë dokumentar, ekipet e TRT World depërtuan në mesin e kolonëve radikalë hebrenj në Bregun Perëndimor, duke dokumentuar në mënyrë ekskluzive dhe të fuqishme se si po uzurpohen sistematikisht tokat e palestinezëve.
Dokumentari hedh dritë mbi shkeljet e të drejtave të njeriut gjatë këtij procesi, mbi sfidat me të cilat përballen civilët në rajon dhe mbi shpërfilljen e së drejtës ndërkombëtare, të gjitha të paraqitura me një gjuhë të guximshme gazetareske.
Në kategorinë e Promovimit të Programit të Lajmeve, “Kulla e Argjendtë” iu dha projektit “Promovimi i Përvjetorit të TRT World” i përgatitur posaçërisht për 9-vjetorin e TRT World. Ky film promovues i përcolli audiencës linjën dhe vizionin e transmetimit të kanalit me një gjuhë vizuale të fuqishme.
Një tjetër çmim “Kulla e Argjendtë” iu dha dokumentarit “Jemeni: Kufiri i Tretë” në kategorinë e Ngjarjeve Aktuale. Ky prodhim hodhi dritë mbi frontet e padukshme të luftës, duke zbuluar njëkohësisht dimensionin humanitar të konfliktit të vazhdueshëm në Jemen.
Ekipi i TRT World arriti të sigurojë qasje ekskluzive në anijen Galaxy Leader, e cila ishte kapur nga rebelët Huthi të Jemenit, duke i sjellë komunitetit ndërkombëtar imazhe tronditëse nga vatra e konfliktit rreth problemeve dramatike në Jemen, të tilla si thellimi i urisë, vështirësia në aksesin në kujdesin shëndetësor dhe mungesa e ndihmës humanitare.
Ky sukses dëshmoi edhe një herë ndikimin e vazhdueshëm të TRT World në skenën globale mediatike dhe angazhimin e saj për të ofruar gazetari cilësore që i flet publikut botëror.
