Waziri Mkuu wa Somalia, Hamza Abdi Barre, alifanyia mabadiliko serikali yake siku ya Jumapili, na kumteua waziri mpya wa ulinzi wakati serikali yake ikijaribu kukomesha uasi wa AL Shabaab.
Barre hakutoa sababu ya mabadiliko hayo, ambayo yalisomwa na msemaji wa serikali kwenye video iliyowekwa kwenye akaunti ya serikali ya Facebook.
Ahmed Moallim Fiqi Ahmed, ambaye awali aliwahi kuwa waziri wa mambo ya nje na mkuu wa usalama wa taifa, aliteuliwa kuwa waziri wa ulinzi, akichukua nafasi ya Jibril Abdirashid.
Barre pia alimteua naibu waziri mkuu wa pili, Jibril Abdirashid Haji Abdi, na waziri mpya wa mambo ya nje, Abdisaalan Abdi Ali Daay.
Hofu ya usalama wa Mugadishu
Uteuzi wa waziri mpya wa ulinzi unakuja wakati serikali ikijitahidi kusitisha mafanikio ya hivi karibuni ya al Shabaab katika mashambulizi ya kundi linaloshirikiana na al Qaeda.
Al Shabaab waliteka kwa muda vijiji vilivyoko umbali wa kilomita 50 (maili 30) kutoka Mogadishu, na hivyo kuzua hofu kwamba mji huo unaweza kulengwa.
Vikosi vya Somalia tangu wakati huo vimeviteka tena vijiji hivyo lakini al Shabaab wameendelea kusonga mbele mashambani, huku mustakabali wa usaidizi wa usalama wa kimataifa kwa Somalia ukionekana kuwa hatarini.
Kundi hilo limekuwa likiendesha uasi tangu 2007, likilenga kupindua serikali na kuanzisha sheria yake kwa kuzingatia tafsiri kali ya sharia.
