Janë hapur qendrat e votimit në Kroaci, ku sot po mbahen zgjedhjet, në të cilat qytetarët do ta zgjedhin pushtetin e ri local nga më shumë se 30.000 kandidatë.

Çdo katër vjet, Kroacia organizon zgjedhje lokale të dielën e tretë të majit, dhe në zgjedhjet e këtij viti morën pjesë 31.082 kandidatë, që është 7.770 më pak se në zgjedhjet e katër viteve më parë.

Më shumë se 3,5 milionë votues do të vendosin se kush do ta mbajë pushtetin vendor në zgjedhjet e këtij viti.

Zgjedhjet mbahen në 576 njësi vendore, nga të cilat në 428 bashki, 127 qytete dhe 20 qarqe, si dhe në kryeqytetin Zagreb, i cili ka statusin e një qyteti dhe një qarku.

Fushata për zgjedhjet lokale përfundoi në mesnatë të premten dhe filloi heshtja zgjedhore, e cila zgjat deri në orën 19:00, ose deri në mbylljen e 6.600 qendrave të votimit.

Komisioni Shtetëror i Zgjedhjeve u bëri thirrje të gjitha palëve të përfshira në zgjedhje, si dhe qytetarëve dhe mediave, që ta respektojnë heshtjen.

Anëtarët e pakicave kombëtare do të zgjedhin nga radhët e tyre, ndër të tjera, dhjetë zëvendësprefektë, 18 zëvendëskryetarë bashkie dhe 39 zëvendëskryetarë komune.

Analistët vlerësojnë se zgjedhjet lokale të vitit 2025 do të jenë garë e ngushtë.

Gara zgjedhore për kryetar bashkie të Zagrebit po tërheq vëmendjen më të madhe dhe vëmendja e publikut është gjithashtu në zgjedhjet lokale për Rijekën, Osijekun dhe Splitin.