Në Shqipëri është shënuar Dita e Dëshmorëve të Atdheut, ku në vend janë organizuar ceremoni dhe aktivitete të ndryshme.

Ceremonia qendrore për Ditën e Dëshmorëve është organizuar në Varrezat e Dëshmorëve në Tiranë, me pjesëmarrjen e zyrtarëve të lartë të vendit.

Pjesë e ceremonisë qendrore ishin presidenti i Shqipërisë, Bajram Begaj, kryeparlamentarja Elisa Spiropali, ministra dhe zyrtarë të tjerë të lartë.

Zyrtarë dhe të pranishëm të tjerë bënë homazhe dhe vendosën kurora me lule në Monumentin "Nëna Shqipëri".

Me rastin e 5 Majit, zyrtarët e lartë dhe drejtues të institucioneve të ndryshme kanë përcjellë mesazhet e tyre të urimit.

"Më 5 Maj, Ditën e Dëshmorëve, përulemi para guximit dhe sakrificës së atyre që dhanë gjithçka për çlirimin e Shqipërisë. Vlerat e tyre, trimëria dhe përkushtimi ndaj lirisë janë trashëgimi e shenjtë. Ne e kemi për detyrë t'i përcjellim brezit të ri këtë flakë atdhedashurie, duke nderuar përjetësisht kujtimin e tyre", ka shkruar presidenti Begaj në rrjetet sociale.

Kryetarja e Kuvendit të Shqipërisë, Elisa Spiropali, në rrjetet sociale ka shkruar se sot përulen me nderim të thellë ndaj dëshmorëve të Atdheut.

"Nderimi më i madh për dëshmorët është të realizojmë amanetin për të cilin ata ranë fli: Shqipërinë e zhvilluar, të drejtë dhe demokratike, e barabartë në dinjitet me kombet e kontinentit ku përkasim", ka shkruar Spiropali.

"Të paharrueshëm, Dëshmorët e Atdheut", ka shkruar kryeministri Edi Rama në rrjetet sociale.

Aktivitete dhe ceremoni të ndryshme me rastin e Ditës së Dëshmorëve janë organizuar edhe në qytete të tjera të Shqipërisë.

Kujtojmë se 5 Maji është caktuar me ligj nga Kuvendi i Shqipërisë si Dita e Dëshmorëve të Atdheut.