Agjencia e brendshme e inteligjencës e Gjermanisë ka klasifikuar partinë e ekstremit të djathtë AfD si një "grup ekstremist i provuar", një përcaktim që si duket do ta ngjallë debatin për ndalimin e partisë.

Zyra Federale për Mbrojtjen e Kushtetutës (BfV) njoftoi se hetimi i saj i gjerë ka përcaktuar se partia ka ndjekur një agjendë nacionaliste dhe ekstremiste të ekstremit të djathtë, duke minuar në mënyrë aktive rendin kushtetues demokratik të Gjermanisë.

"Kuptimi mbizotërues i partisë për njerëzit bazuar në etni dhe prejardhje është i papajtueshëm me rendin kushtetues demokratik të lirë", tha BfV-ja, duke theksuar se AfD-ja ka kërkuar të përjashtojë grupe të caktuara të popullsisë nga pjesëmarrja e barabartë në shoqëri duke i nënshtruar ata ndaj trajtimit diskriminues.

Për shembull, shpjegoi BfV-ja në vlerësimin e saj, "AfD-ja nuk i konsideron qytetarët gjermanë me prejardhje migrimi nga vendet myslimane si anëtarë të barabartë të shoqërisë, pasi i përcakton njerëzit gjermanë vetëm në terma etnikë".

Partia AfD, e njohur për qëndrimin e saj anti-imigracion, fillimisht u vu nën vëzhgim paraprak në vitin 2019. Më vonë u klasifikua si një "grup i dyshuar ekstremist" në vitin 2021, një përcaktim që gjykatat në Këln dhe Münster e mbështetën pavarësisht kundërshtimit ligjor të partisë.

Ky përcaktim u lejon shërbimeve të sigurisë të përdorin mjete më të forta inteligjence për mbikëqyrjen e aktiviteteve të partisë, të tilla si kryerja e mbikëqyrjes së komunikimeve dhe rekrutimi i informatorëve për t'i monitoruar aktivitetet e dyshimta të degëve të partisë dhe lidhjet e tyre me grupet ekstremiste të jashtëligjshme.

Mbështetja ndaj Alternativës për Gjermaninë (AfD) ka arritur një rekord prej 26 për qind në sondazhet e fundit të opinionit. Partia anti-imigracion ka fituar pesë pikë përqindjeje që nga zgjedhjet e parakohshme të muajit shkurt, duke e bërë atë partinë më të fortë të Gjermanisë për herë të parë.

AfD-ja ka rritur ndjeshëm përqindjen e votave të saj në muajt e fundit duke bërë fushatë kundër emigracionit, duke shkaktuar frikë te myslimanët dhe emigrantët. Partia gjithashtu ka përfituar nga frustrimi me partitë tradicionale dhe frika nga një rënie ekonomike.

CDU/CSU-ja e kandidatit për kancelar Friedrich Merz ka rënë në vendin e dytë me 24 për qind mbështetje në sondazhet e fundit, duke shënuar një rënie prej 4,5 pikësh përqindjeje nga fitorja e tyre në zgjedhjet e muajit shkurt. Partneri i tyre i koalicionit, Social Demokratët (SPD), ka rënë në 14 për qind, duke shënuar një rënie me më shumë se 2 pikë përqindjeje nën rezultatin e tyre zgjedhor.