Me rastin e 1 Majit, Ditës së Punëtorëve, Lidhja e Sindikatave në Maqedoni të Veriut (LSM) ka organizuar një marsh protestues, duke kërkuar paga më të larta, kushte të mira pune, si dhe respektim të marrëveshjeve kolektive dhe të drejtave të punëtorëve.

Lidhja e Sindikatave nisi marshin tradicional paraditen e sotme, duke filluar nga Shtëpia e Punëtorëve drejt parlamentit për të përfunduar para godinës së qeverisë, ku shpallën kërkesat e tyre, ndër to paga më të larta dhe kushte më të mira pune.

Kërkesat kryesore të sindikalistëve që marshuan rrugëve të Shkupit mbeten që paga minimale të jetë 500 euro dhe të gjitha pagat e tjera të rriten me 100 euro, si dhe që të respektohen marrëveshjet kolektive dhe të drejtat e punëtorëve. Sipas tyre, pagat në Maqedoni të Veriut janë “të mjerueshme dhe nuk rriten siç parashikohet nga marrëveshjet kolektive”.

Sipas të dhënave të fundit nga Enti Shtetëror i Statistikave i Maqedonisë së Veriut, nga gjithsej 691.736 punonjës aktiv në vend, paga mesatare neto është 43.050 denarë, ndërsa paga minimale neto është 24.379 denarë.

Dita Ndërkombëtare e Punëtorëve, e njohur edhe si Dita e Punës, shënohet më 1 maj në më shumë se 80 vende të botës, edhe pse nuk njihet si festë zyrtare në secilën prej tyre. Kjo ditë nderon kontributet dhe arritjet e punëtorëve.

Dita e Punës i ka rrënjët në luftën e punëtorëve të fundit të shekullit të 19-të, veçanërisht në ngjarjen Haymarket të vitit 1886 në Chicago, ku punëtorët po avokonin për kushte më të mira pune, e cila kërkoi një ditë pune tetëorëshe.