Meksika i tha të enjten Gjykatës Ndërkombëtare të Drejtësisë (GjND) se çnjerëzimi i një popullsie të tërë në Gaza "nuk duhet të normalizohet", duke theksuar se ky është një "moment vendimtar" për ligjet dhe organizatat ndërkombëtare.

"Ky është një moment vendimtar, jo vetëm për mbrojtjen e rolit të Kombeve të Bashkuara dhe të së drejtës ndërkombëtare, por edhe për ruajtjen e njerëzimit tonë të përbashkët. Bota nuk duhet dhe nuk mund të normalizojë çnjerëzimin e një populli të tërë", tha Pablo Arrocha Olabuenaga, përfaqësues i Meksikës në gjykatën e Hagës.

"Asnjë konflikt nuk mund të vijë me koston e dinjitetit njerëzor."

Meksika i kërkoi gjykatës të konfirmojë se të gjitha shtetet anëtare të OKB-së, përfshirë Izraelin, janë ligjërisht të detyruara të respektojnë privilegjet dhe imunitetet e OKB-së dhe agjencive të saj, të lehtësojnë ndihmën humanitare dhe të shmangin masa që pengojnë përpjekjet për ndihmë në territoret e pushtuara, tha Arrocha.

"Realiteti që po zhvillohet para syve tanë në Gaza nuk mund dhe nuk duhet të justifikohet", shtoi ai. "Fëmijët nuk kanë ushqim. Po humbin jetë."

Ai argumentoi se katastrofa humanitare në Gaza është “një zgjedhje e qëllimshme, pasojë e një vendimi politik”, duke theksuar se ajo është si e shmangshme, ashtu edhe e kthyeshme.

Në emër të Meksikës, ai i bëri thirrje Izraelit, si një shtet anëtar i OKB-së dhe fuqi pushtuese, të përmbushë detyrimet e veta sipas së drejtës ndërkombëtare humanitare dhe të drejtave të njeriut, përfshirë lejimin dhe lehtësimin e ndihmës humanitare pa pengesa dhe sigurimin e mbrojtjes së civilëve.

Patricia Perez, po ashtu përfaqësuese e Meksikës, i tha gjykatës se situata po bëhet “edhe më e rëndë” çdo ditë, pavarësisht thirrjeve të vazhdueshme ndërkombëtare për vetëpërmbajtje, akses dhe mbrojtje.

Ajo tha se përkeqësimi i kushteve thekson rreziqet urgjente ligjore dhe morale të këtij rasti, veçanërisht për sa i përket detyrimeve të Izraelit sipas së drejtës ndërkombëtare.

Që nga 2 marsi, Izraeli ka mbyllur pikat kufitare të Gazës, duke bllokuar furnizimet thelbësore për të hyrë në enklavën që po përballet me uri.

Ushtria izraelite rifilloi ofensivën ndaj Gazës më 18 mars, duke shkelur marrëveshjen e armëpushimit dhe shkëmbimit të pengjeve të arritur më 19 janar me grupin e rezistencës palestineze, Hamasin.

Të paktën 52.400 palestinezë janë vrarë në Gaza që nga tetori i vitit 2023 në një ofensivë brutale izraelite, shumica prej tyre gra dhe fëmijë.