BOTA
2 minuta leximi
Siria dhe BE-ja diskutojnë aktivizimin e planeve të rindërtimit pas heqjes së sanksioneve
Kryediplomati i Sirisë, Asaad al-Shaibani, diskutoi me shefen e diplomacisë së BE-së, Kaja Kallas, rreth mënyrave për t'i aktivizuar planet e rimëkëmbjes së hershme dhe rindërtimit, pas vendimit të BE-së për të hequr sanksionet ekonomike ndaj Sirisë.
Siria dhe BE-ja diskutojnë aktivizimin e planeve të rindërtimit pas heqjes së sanksioneve
Siria dhe BE-ja diskutojnë aktivizimin e planeve të rindërtimit pas heqjes së sanksioneve / AA
21 Maj 2025

Në një bisedë telefonike me diplomaten evropiane, Shaibani shprehu mirënjohjen e tij për vendimin e BE-së për të hequr plotësisht sanksionet, duke e cilësuar atë si një “sinjal pozitiv për forcimin e bashkëpunimit dhe mbështetjen e rrugëve drejt stabilitetit”, thuhet në një njoftim nga Ministria e Jashtme siriane.

Shaibani dhe Kallas ranë dakord për veprime të përbashkëta për hapat e ardhshëm dhe theksuan rëndësinë e koordinimit dhe mirëkuptimit të ndërsjellë në çështjet politike, humanitare dhe ekonomike, shtoi ministria.

Diskutimi përfshiu gjithashtu “rëndësinë e aktivizimit të planeve të rimëkëmbjes së hershme dhe rindërtimit përmes bashkëpunimit të ngushtë ndërmjet qeverisë siriane dhe BE-së, për të garantuar një reagim efektiv ndaj nevojave themelore dhe mbështetjes për infrastrukturën”.

Sipas ministrisë, të dy palët theksuan domosdoshmërinë e koordinimit për rikthimin e denjë dhe vullnetar të refugjatëve sirianë, në bashkëpunim me BE-në dhe vendet fqinje si Türkiye, Jordania dhe Libani.

Të martën, BE-ja vendosi t'i heqë sanksionet ekonomike ndaj Sirisë për ta mbështetur popullin sirian në rindërtimin e vendit pas më shumë se një dekade lufte civile.

Ky vendim i BE-së erdhi një javë pas direktivave të Presidentit amerikan Donald Trump drejtuar Departamentit të Thesarit për të hequr sanksionet që ishin vendosur fillimisht ndaj Sirisë në vitin 1979 dhe u zgjeruan pas shpërthimit të luftës civile në vitin 2011.


BURIMI:TRT Balkan dhe agjencitë
Hidhini një sy TRT Global. Ndani komentet tuaja!
Contact us