Kryeministri britanik Keir Starmer, Presidenti i Këshillit Evropian António Costa dhe Presidentja e Komisionit Evropian Ursula von der Leyen dënuan së bashku ofensivën ushtarake të vazhdueshme të Izraelit në Gaza gjatë një konference për shtyp pas samitit MB-BE të hënën.

Starmer e përshkroi sulmin izraelit në Gaza si “të papranueshëm, të patolerueshëm” dhe theksoi urgjencën për një përgjigje të koordinuar ndërkombëtare. “Pikërisht për këtë arsye po punojmë intensivisht në koordinim me liderë të tjerë për ta gjetur mënyrën se si duhet të reagojmë”, tha ai.

Duke përsëritur thirrjen për përfundimin e menjëhershëm të dhunës, Presidenti i Këshillit Evropian António Costa deklaroi: “Izraeli duhet të ndalojë tani, menjëherë, dhe ne të gjithë bashkë, si komunitet ndërkombëtar, duhet të ndihmojmë për të ndërtuar dy shtete.”

Shefja e Komisionit Evropian, Ursula von der Leyen, përshkroi gjithashtu një pamje të rëndë të krizës humanitare në Gaza, duke thënë: “Situata humanitare në Gaza është e papranueshme prej dy muajsh, asnjë ndihmë jetike nuk ka hyrë në Gaza. Ndihma duhet t’u shkojë menjëherë civilëve në nevojë dhe bllokada mbi Gazën duhet të hiqet tani, sepse ndihma humanitare nuk duhet kurrë të politizohet.”

Ajo gjithashtu bëri thirrje për rifillimin e përpjekjeve diplomatike për t’i dhënë fund konfliktit.

“Po bëjmë thirrje për rifillimin e armëpushimit dhe lirimin e menjëhershëm të pengjeve, në mënyrë që të arrihet më në fund një fund i përhershëm i luftimeve. Jemi të bindur se zgjidhja e vetme është ajo me dy shtete. Kjo kërkon, ndër të tjera, një Autoritet Palestinez funksional. Ne po e mbështesim dhe po e financojmë fuqimisht Autoritetin Palestinez”, shtoi von der Leyen.