Shefja e politikës së jashtme të Bashkimit Evropian deklaroi të martën se blloku nuk do të tolerojë kërcënime ndaj sovranitetit dhe integritetit territorial të Bosnjës e Hercegovinës në mes të veprimeve separatiste nga udhëheqja e serbëve të Bosnjës.

“Çdo përpjekje për të shpërbërë vendin është e papranueshme”, tha Kaja Kallas në një konferencë për shtyp në Sarajevë.

“Udhëheqja e Republikës Sërpska po minon rendin kushtetues dhe ligjor të vendit, duke kërcënuar liritë themelore të të gjithë qytetarëve”, shtoi Kallas, duke iu referuar entitetit serb në Bosnjë e Hercegovinë.

Kallas shtoi se EUFOR-Althea në Sarajevë, misioni ndërkombëtar i paqes, ka mbështetur sigurinë në Bosnjë e Hercegovinë.

Vendimi i BE-së në mars për të rritur numrin e trupave të EUFOR-it Althea me qindra forcon “mesazhin e qartë se BE-ja mbetet e përkushtuar fuqishëm ndaj stabilitetit të këtij rajoni dhe sigurisë së Bosnjë e Hercegovinës”, shtoi ajo.

Kallas theksoi rëndësinë që udhëheqësit politikë të bashkëpunojnë për të përballuar sfidat, por paralajmëroi se “retorika nxitëse dhe veprimet përçarëse janë të rrezikshme” dhe bien ndesh me angazhimet që vendi ballkanik ka marrë në rrugën e tij drejt anëtarësimit në BE.

Populli i Bosnjës e Hercegovinës meriton asgjë më pak se stabilitet dhe mirëqenie, u shpreh Kallas, duke shtuar se BE-ja do të mbetet partneri më i qëndrueshëm, i besueshëm dhe i parashikueshëm për vendin.

Përparimi në rrugën drejt BE-së është garancia më e fortë për mirëqenien dhe stabilitetin e Bosnjës e Hercegovinës, përfundoi ajo.