Një student palestinez i ndaluar në fillim të këtij muaji gjatë një interviste për shtetësi, duhet të qëndrojë në shtetin amerikan të Vermontit për të paktën 90 ditë, ndërsa ekipi i tij ligjor vazhdon përpjekjet për lirimin e tij, vendosi të mërkurën një gjykatës federal, raporton CBS News.

Gjykatësi amerikan Geoffrey Crawford, tha se do të zgjasë urdhrin e mëparshëm që ndalon deportimin ose transferimin e Mohsen Mahdawit jashtë shtetit, sipas avokatëve të tij.

Gjykatësi caktoi një tjetër seancë për rastin e Mahdawit për javën e ardhshme, ndërsa një seancë e veçantë në gjykatën e emigracionit është planifikuar për më 1 maj në Luiziana, megjithëse statusi i kësaj paraqitjeje mbetet i paqartë.

Avokatja e Mahdawit, Luna Droubi, deklaroi se autoritetet nuk kanë asnjë bazë ligjore për ndalimin e tij, duke theksuar se ky është një “turp për Kushtetutën e ShBA-së”.

"Qeveria nuk ka asnjë bazë për ndalimin e Mohsen Mahdawit, përveç pranimit të tyre se ata e ndaluan Mohsenin në bazë të fjalimit të tij", tha ajo në një deklaratë.

Mahdawi është studenti i nëntë nga Universiteti Columbia që është shënjestruar për deportim për shkak të aktivizmit pro-palestinez në kampus, në kuadër të një goditjeje më të gjerë nga administrata Trump.

Administrata ka përdorur urdhra ekzekutivë për të dëbuar studentët ndërkombëtarë të akuzuar për “qëndrime armiqësore” ndaj ShBA-së, veçanërisht ata të përfshirë në protesta kundër sulmeve izraelite në Rripin e Gazës.

Që nga tetori i vitit 2023, sulmet brutale izraelite kanë vrarë më shumë se 51,300 persona në Gaza, duke nxitur protesta të shumta në kampuset amerikane.

Kritikët e kanë akuzuar administratën Trump se po barazon kritikat ndaj veprimeve të Izraelit me antisemitizmin, për të justifikuar deportimet.